寫緊呢篇文嘅時候，仲係四月二日午夜之前，所以都仲係喺Karfreitag。
Karfreitag，直接翻譯叫「受難星期五」，中文翻譯做「耶穌受難節」似乎最啱聽。
淨係聽個名，都知道關耶教事啦…呢日係用嚟紀念耶穌被釘十字架的，而德國係有超過一半嘅人口屬於天主教徒或者係新教徒。所以呢一日，可以話係德國人成年入面最需要「受戒」嘅一日，雖然係假期，但係唔準你慶祝。
我要慶祝，你吹咩！
咁你小心啲，一嚟啲教徒可能會仇視你，二嚟你開心到跳舞的話，係會畀人拉的！
難以置信：呢一日，係法例規定，連跳舞都會犯法的！德國法例真係寫到明特定日子有Tanzverbot「限舞令」，違者可被罰款，喺拜仁州甚至可以罰成一萬歐！跳隻舞，分分鐘跌幾皮，都咪話唔癲！
呢個禁令，make唔make sense，我答你唔到，德國好多人都有討論，Tagesschau都有討論過。
呢啲紀念齋戒嘅日子，當然唔可以過份享受，味覺上都要保持清淡。所以，另外一個大家喺德國應該守嘅傳統係，呢一日唔好買肉，唔好食肉。
…所以德國人會選擇食魚。
係，「大魚」無問題，唔「大肉」就可以。唔好問我點解。
魚肉係唔係肉？呢個問題我唔知點答你好。
爲咗緊貼傳統，我都真係買咗條德國人最愛嘅鱒魚Forelle返嚟食。本來我有魚牌，可以自己釣，但呢個活動真係太過奢侈（時間上）。
正常就應該成條食的，但係我今次想起曬啲肉出嚟，容易啲分俾仔仔食。Forelle係多骨的，但係如果識起肉，其實都唔會太多骨黐喺啲肉度。想知點起，大家可以睇睇片。
PS:因爲係第一次用燒烤機嚟煮，所以條魚上面有坑紋，而且乾咗少少，啲肉好容易碎，起肉唔係起得太靚，請多多見諒。
延伸閱讀：
【德國飲食】用慕尼黑啤酒館 Tap House 的小冊子介紹啤酒種類
此為石賈墨之原創文章，轉載前請事先徵求授權並註明出處 www.stegermatt.de
想緊貼我嘅最新動態？即刻Follow我嘅Facebook同Instagram！
歡迎隨時聯絡我了解更多
WhatsApp: +4917695274920
Signal: +4917695274920
Telegram: @Stegermatt
Write a comment