【石賈墨】歌德學院專訪系列#5：又到聖誕，又到聖誕

相關文章：【石賈墨】歌德學院專訪系列#4：幾枝竹一扎斷折難

十二月啦，二零一九年話咁快就已經開始倒數，聖誕都好快到。趁住呢個機會，就等石賈墨喺我地嘅第五個專訪度，講解一下佢點樣慶祝呢個德國最重要嘅節日，點樣體驗呢個節日背後嘅傳統。

佢亦都會同我地講下，佢點樣同屋企人喺德國慶祝聖誕，同埋佢最想收到啲咩禮物。當然我地都會問埋佢嚟緊新嘅一年，有咩新願望啦！

德國人聖誕通常會喺屋企同屋企人過。咁你又係點樣同你屋企人過呢？作為香港人你喺德國點過聖誕？

等咗咁耐，聖誕終於就快到！

香港人其實都會慶祝聖誕，不過喺德國，慶祝嘅方法當然會好唔同。我就成日比較德國嘅聖誕，同香港嘅新年。需知道過年係成年最大嘅節日，德國嘅聖誕，對於德國人嚟講，亦都係最緊要嘅時節。所以我嚟德國第一次過聖誕，真係覺得好「緊張」，唔知道我可唔可以同啲德國人一齊享受呢個既熟悉又突然陌生嘅節日。

一開始，我就真係望到實一實，觀察下啲德國人點慶祝，我老婆話要點做，我就照做。例如話點下Adventkranz上面嘅蠟燭，甚至到成家人一齊唱聖誕歌，我都一一照跟。

不過其實我都叫好彩，可以跟我老婆嘅「指令」嚟慶祝，所以都好快理解到德國人嘅傳統。一開始我就只能夠跟住嚟慶，過多幾年之後，我就開始自己擔起準備聖誕嘅責任，尤其係做咗一家之主之後，就更加會主動安排慶祝聖誕嘅細節。我有個同事，佢自己有一個農場，我呢幾年都係去佢度，自己揀聖誕樹，自己托一棵返屋企，亦都會做埋大廚，幫全家人煮聖誕大餐。
 
雖然我離開咗自己嘅家鄉，但係每一年我喺德國度慶祝聖誕，我都覺得，德國其實就係我另一個家鄉。諗起其實真係好開心，喺德國都搵到家嘅感覺。

第一年嚟德國，就已經有得過白色聖誕，真係好好彩呀！見到雪，我第一時間就想親手砌一個雪人出嚟。不過，砌雪人都需要一定功夫，新手如我，當然失敗收場。咁點算？反正都砌咗一半，俾少少創意，結果我整咗隻雪龜出嚟…

喺德國聖誕節之前嘅日子對於德國人黎講都係幾特別。平安夜之前四個禮拜嘅禮拜日就係降臨節(Advent)。周圍都係聖誕市集，小朋友會收到聖誕樹曆(Adventskalender)。你會點樣過德國嘅聖誕節呢？

我覺得有時十二月聖誕就嚟到嘅時間，其實仲開心過慶祝聖誕嗰兩三日，因爲個氣氛真係好舒服好溫暖。例如話，我記得差不多十年前，我第一次收到Adventskalender，真係十分驚喜。本來Adventskalender係俾細路仔玩嘅，個聖誕日曆有二十四個窗口，十二月一到，每一日都可以打開一扇窗，通常後面都會有一張相，或者有一粒朱古力，朝朝起身，小朋友都會充滿期待咁打開下一個窗口。

爲咗等我可以體驗一下呢個傳統，我老婆都特登買一個俾我玩，等我開心下。到依家，佢每一年都會買一個Adventskalender俾我，今年仔仔都有自己一個，我同佢一齊開，都覺得佢好開心。
 
喺呢段聖誕來臨之前嘅時間，我同屋企人，朋友最常做嘅活動，就係去聖誕市集，冰天雪地，飲一杯又暖又香噴噴嘅Glühwein（一種用特殊香料同紅酒煮出嚟嘅熱酒），食下炒栗子（係呀，德國都有炒栗子食！），聽下聖誕市集啲兒童合唱團…
 
不過，十二月出街的話，真係好凍，所以有時都會寧願留喺屋企，開住個暖爐，沖一杯熱茶，舒舒服服咁坐喺張梳化度，望住啲聖誕燈飾，真係疏乎。最好就係有埋天時地利，落埋雪，咁就可以過一個白色聖誕。
 
講起白色聖誕，德國人每年年尾都會求神拜佛，希望聖誕嗰幾日會落大雪，嗰種氣氛，真係好似入咗童話世界咁。

幫棵聖誕樹裝身，可以話係平安夜最重要嘅活動。如果講裝飾呢家嘢，真係唔係我強項，不過到裝飾完嗰一刻，就知道辛苦得嚟係有回報的。一棵靚靚嘅聖誕樹，可以爲屋企嘅聖誕氣氛加唔少分！

 

聖誕節最重要梗係禮物同祝福。你有無試過喺你啲德國親戚或者朋友收到啲令你o嘴嘅禮物？你今年又有咩想要嘅禮物？

講起禮物我就頭痛啦！每一年我都要諗到頭都大埋，先諗到送咩畀老婆同屋企人好。不過好好彩，我屋企人送俾我嘅禮物，我都好鍾意，從來都無話收到咩奇怪嘅禮物。

不過講起奇怪嘅禮物，就一定要介紹返一個雖然唔屬於傳統，但係喺德國都幾流行嘅活動：Schrottwichteln。呢個字，我唔知道點翻譯啦。Schrott，解做廢物，簡單啲嚟講，唔係「交換禮物」，而係「交換廢物」。
 
咁點解聖誕要送廢物畀人呢？其實都係好玩咁解啦！送嘢畀人，唔需要特登走去買，喺屋企搵一樣自己唔再用，但係其他人收到可能覺得好好玩嘅嘢，既環保，又慳錢。屋企咁多唔等駛嘅嘢，聖誕終於有機會可以清一清，不知幾開心，哈哈…

舊年我地起咗一間屋，不過個花園都仲未整好。早幾日園藝師同我地講，佢喺聖誕之前可以開工。如果佢真係今年就已經可以整好個花園，咁我就終於可以完結呢個橫跨三年嘅起屋大計，咁對我嚟講，就係最好嘅聖誕禮物啦！

Adventskalender，中文可以翻譯做聖誕節月曆，我自己覺得係一個好好嘅德國傳統，尤其係啲小朋友，收到月曆，開心到震。而十年前，我收到我老婆送俾我嘅第一個聖誕月歷。你睇得到，打開第一扇窗嘅時候，我真係開心過啲細路仔！

 

聖誕節之後一個禮拜就係新年。通常德國人慶祝新年都會開party放下烟花。點解啲德國人過新年過到鬼煞咁嘈？你點睇？

德國人新年除夕叫Silvester，咁我覺得，新年新開始，無論係香港人定係德國人，都會希望可以好好慶祝。放下煙花，爆竹一聲除舊歲，響噹噹咁迎接新開始，好事嚟嘅。
 
香港人慶祝新年，你諗下，其實都會放煙花，只不過唔喺自己屋企放，係喺維港公家放咁解。我自己去過維港一次睇煙花，結果淨係有人頭睇…我老早就放棄咗去維港睇煙花呢個活動。最多開個電視出嚟，隔住個Mon感受下啲煙火，咁所謂嘅「放煙花」，其實都只不過係一個額外嘅節目，唔係話好重要。
 
德國人就唔同啦，慶祝新年，都會放煙花，不過係自己放。係呀，德國人新年慶祝，政府係俾人買煙花自己放的。咁所以入鄉隨俗，我每年都會買煙花的，當然係等自己可以同屋企人一齊欣賞煙花啦！

十二月三十一號晚，喺屋企食完個晚飯，吹下水，好清楚知道午夜並不彷徨，因爲千家萬戶會一齊喺踏入新一年嘅時候一齊放煙花，多到猶如晚星墜落！而煙花驟放所造成的迷霧，並不能掩蓋遠處傳來的爆破聲。喺呢個近距離體驗煙花嘅時刻，大家就會許願，其實真係一個好美好嘅時刻。
 
買煙花呢回事，我從來都唔會太過份，年尾去超級市場買嘢，成日都見到有人成車成車咁買…傻的嗎？尤其係之前參加過消防隊，新年啲人亂放煙花，啲消防員就無得慶祝，去消防局齊集這裡，衝去火場，對住煙花造成嘅火災全力抗對，有時候啲火誇張到，灑水幾耐，好似也永不滅！
 
所以，玩新年「火魔法」，真係小心啲好！
 

聖誕馬槽，我當然未去德國之前就已經見過。香港人雖然慶祝聖誕，不過都好少話會起個馬槽嚟做裝飾。呢張相，我一upload咗上Facebook，就已經有一個朋友話：張相，令我諗起Mr. Bean嘅聖誕特輯！

 

新一年新願景，唔單只德國人會咁做。2020年你有咩願景？

新年新開始，我諗今年對於我嚟講，呢句嘢真係珍珠都無咁真…

過去幾個月，作爲一個香港人，就算喺德國都好，我諗我地無可能放得低自己家鄉發生緊嘅一切。

我自己覺得，作爲投身德國戰線嘅香港人，我其實可以做得更加多，所以一路都思考緊，到底我可以點樣安排嚟緊嘅生活，同其他香港人一齊準備好呢個挑戰。

最後我決定咗，下年一月一日開始，我就會辭職，脫離工程師嘅身份，用一個自由工作者嘅身份做嘢。其中一個好重要嘅元素，係我打算將我嘅工作同香港嘅抗爭運動連結，希望可以喺度同德國人講解返香港嘅情況，亦都希望可以支援到香港人，無論佢地喺香港又好，嚟咗德國都好，我都好想可以幫到手。
 
所以我嘅願望其實好簡單，就係可以有一個好開始，去揭開人生新嘅一頁。
 
當然，我更加希望香港可以喺呢一場爲民主同自由嘅戰爭當中，成爲勝利嘅一方啦。

一到十二月，好多德國人都會放慢腳步，喺年尾休息一下。其實我都想咁做，不過我相信其他香港人都一樣，呢幾個月嚟，睇到香港發生緊啲咩嘢，已經好難話抽啲空閒時間出嚟攤抖下。而喺德國，真係無幾個香港人可以有條件遠距離投身香港嘅運動。一嚟無咩香港人可以唔怕喺一大班德國人面前講德文，亦都未必可以對香港嘅政治局勢暢所欲言。就係因爲呢個原因，我決定二零二零年轉型，全力投身教授德文，而且喺德國呢邊，都盡力參與香港嘅運動。不過我最大嘅願望，都係希望香港人可以喺嚟緊嘅一年，打贏呢一場爭取民主嘅仗！