【石賈墨】逸議漫漫：既非冷水，也非溫泉

May be an image of nature

P.S. 大家見唔見到我老婆同我個仔呢？

眾新聞呢篇專欄，我寫咗好耐，一嚟因爲之前一路都好忙，只能夠每日寫啲每日寫啲，真係龜速咁寫。

二嚟我寫嘅時候，係根據練乙錚先生嘅文章去做對照，所以未寫得出一個框架之前，我都分唔到第一篇出嚟。

「其實你又唔好咁悲觀。」

出咗稿，啱啱好我老婆又remind我呢樣嘢。

「其實你又唔好咁悲觀。」

今日星期日，我同我老婆，仔仔喺黑森林邊緣嘅葡萄田之間散步，佢就好堅決咁同我講。

其實我唔知道到底係我死好彩，定係性格使然，畀我搵到個德國人做老婆，仲可以嚟德國生活，做嘢。有時候真係覺得自己離開香港九千公里，同一堆本來同自己生活完全無可能有交集嘅人喺埋一齊，竟然又唔會有違和感，其實真係幾神奇。

好記得有一次做嘢，同四五個同事同老闆傾緊一個全新嘅Project，講緊點樣可以設計一部機器去剝蕉皮，由於我當時係負責lead住個Project嘅主要人物，所以其實個討論好多時候都係我做moderation。

我好記得當時完咗個討論之後，我行出咗個Meeting room，又係笑咗好耐。

係好開心，好幸福嗰種笑。

一個香港人，去到德國一間細得嚟，但喺行業有一個領導地位嘅德國公司，用德文lead住四五個德國人認真咁討論點樣用機器剝蕉…

頂，其實做到呢個境界，真係夫復何求。

複雜的人際關係

上堂嘅時候，我成日笑我自己係毒撚，雖然係講笑，但係其實背後真係有根據。

我自己真係無能力處理啲有關人際關係嘅複雜問題，真係無，係近乎零…

由我開始喺德國做嘢嘅第一日開始，我自己從來無思考過自己要點樣處理同同事嘅關係，我做工程呢行，其實啲嘢都幾實在，所以我知道自己某啲位係因爲呢種能力缺失，爲自己帶嚟咗啲麻煩，但係其實都無特別思考到底要點「改善」。

做返自己，實事求是，直接坦蕩，永遠唔玩小圈子，講人壞話。

依家返到去一開始我老婆同我講嗰句嘢，佢話我唔好咁悲觀，其實就係講呢樣嘢。

我記得有一次我因爲完全盲目信任一個人，所以差啲有啲錢銀上嘅損失，銀碼唔夠一萬港紙，其實唔算多，但係我就好懊惱，呢個唔係銀碼嘅問題，而係覺得自己點解咁天真。我同我老婆講，話我有啲嬲，之後唔可以咁容易信人。

佢語氣幾重，我以爲佢想鬧我傻仔俾人呃，但係唔係，佢話：「係，你畀人呃，但係爲咗幾千蚊，你懊惱成日，以後見到人都唔信任人，成日要計算人地會唔會呃你，值得咩？呃你嘅人，一百個入面得個一個半個，因爲呢啲人改變自己開放直接嘅一面，你就真係畀你自己呃咗。唔好理佢啦，訓覺啦！」

我老豆成日話啲德國人唔夠香港人醒目，係，但係我覺得唔醒目有唔醒目嘅好。

希望與失望；期盼與擔憂

對於香港會點走落去，我自己點走落去，我自己嘅感覺成日都會起起伏伏，你睇我呢篇專欄，其實都知道，我既有希望，亦有失望，既有期盼，又有擔憂。

近來又遇上啲有關人事關係嘅問題，但我又同我老婆講，「唉，我諗我都係唔太適合同香港人合作。」

唔好講笑，我同德國人一齊做嘢，真係未試過有問題。

但係佢都係同我講：「其實你又唔好咁悲觀。」佢啱，其實都總有幾個香港人我同佢地一齊做嘢都做得幾開心。

多得佢，我接受到自己不善同人合作嘅一面。我諗我唔需要樂觀悲觀，專注返自己做到啲咩就可以。

人生路上，總有起伏，既非冷水，也非溫泉。要時刻提醒自己，一定要忠於自我。

可能呢個就叫「棱角分明」掛。