相關文章：【石賈墨】歌德學院專訪系列#5：又到聖誕，又到聖誕
二零二零年對於德國同香港嚟講都係政治動蕩嘅一年。正當香港嘅示威運動依然持續，德國嘅社會亦面對住右翼興起嘅問題。
喺一年的訪問中，石賈墨會同我們分享政治喺他生活以及喺德國社會扮演嘅角色，亦會探討下德國同香港政治喺參與方面嘅大不同。
你認為你自己係個政治熱衷嘅人？政治嘅參與對你嚟講係啲乜
唔覺，我唔會話我自己係一個熱衷政治嘅人。當然過去呢幾個月，我都有留意德國同香港嘅政治發展，但係我覺得我自己嘅政治參與，其實都係面向返香港人，德國人，同埋佢地嘅感受。
我諗所有喺德國嘅香港人，見到香港嘅情況，都會覺得好無助，尤其係見到自己嘅朋友，親人，係呢度時間一路承受住幾多痛楚，就更加希望可以幫到手。我相信呢個都係喺呢邊嘅香港人，點解會有咁大政治參與嘅原因。
我自己唔係好鍾意討論香港嘅政治，不過我覺得對我嚟講最重要嘅「政治問題」，係「我可以爲我自己嘅家鄉確確實實做到啲咩？」政治參與，我諗唔能夠流於空談，做冷氣軍師，鍵盤戰士，對香港唔會有咩幫助，不如盡力落手做，實實在在做得幾多得幾多啦。
我嘅所謂「政治參與」，其實都係源於有份幫手眾籌登報。當其時香港嘅形勢十分之惡劣，有一班香港人希望可以通過喺各地著名嘅報章登報，令到全世界都可以關注香港嘅情況。知道有一個可以幫手嘅機會，我都義不容辭，同呢邊嘅報館聯絡，安排登報。而喺《法蘭克福匯報》嘅公開信，都成功吸引咗好多德語媒體嘅關注，亦引發咗好多有關香港議題嘅討論。
你有德國居留權，咁你有無權利去參與德國嘅政治？即使你無投票嘅權利。
德國有一樣嘢叫Wahlomat（真正嘅寫法喺Wahl-O-Mat），係一個好好用嘅網，你上去佢就會問你幾十條問題，你答完之後，就可以大概搵到自己嘅政治偏好，同咩政黨就住某啲議題嘅睇法比較一致。每次選舉之前，我都會玩票性質，上去Wahlomat度答下啲問題，了解下啲政黨嘅政策，諗下如果自己真係有得投票的話，會投俾邊個政黨。每次做完之後，都會覺得Wahlomat幾有啓發性，亦都會感受到，德國人依家最重視啲咩政治議題。
我自己當然知道，因爲德國自己過去嘅歷史，佢地對自己犯下嘅罪行同因此而生出嘅愧疚，反思，永遠都會喺德國嘅政治入面扮演一個好核心嘅角色。但係我作爲一個無呢種文化背景嘅香港人，我自己答Wahlomat問題嘅時候，當然無特登咁改變我自己嘅選擇，所以有幾條問題嘅答案，對於好多德國人嚟講可能會好難理解。咁做完之後，我就同我嘅同事喺食飯嘅時候，傾下呢樣嘢，就發覺呢個國家時至今日，就住好多政治議題，仍然係被過去嘅歷史深深咁影響。
做呢個Wahlomat，再去同同事傾，對我嚟講，已經係一個政治參與。我真係可以用一種親身嘅感受，去理解德國文化同政治，同就咁睇書真係好唔同，亦都真喺覺得長知識了。