· 

【德國戰線】出兵呀不如?略論德國反應慢嘅原因 

 

 

 

 

 

之前分享咗左右紅藍綠講歐盟嘅分析。講得非常之好,好建議大家睇一睇。 

 

相關影片: https://youtu.be/8hEJhS5I-fA 

 

 

德國「奶共」? 

 

好多香港人睇國際事務,仍然走唔出一啲「人格」定型,經常要用一兩個簡單嘅形容詞同動機,去評價一個國家嘅行動。 

例如話,德國就係「奶共」,「人民幣真香」。 

 

首先,現今德國「奶共」係事實,就算我幾鍾意德國都好,都無意幫德國洗白。但係咁唔代表呢個係德國嘅「國格」,唔好用幾個對東方存在幻想嘅德國人去判定成個國家嘅人都係咁(你當然能夠話「東方幻想」係德國人對中國嘅觀感嘅因素之一)。 

而香的話,唔係淨係人民幣香的,美金也香,歐盟入面其他國家印出嚟嘅歐元都一樣咁香。 

 

雖然我都唔係有深入理解,但起碼肯睇一睇個大Picture,啲唔多瞭解個政治背景嘅人,之前德國唔出聲,就鬧德國連聲到唔敢出,到依家德國同歐盟慢慢開始立場強硬,你又話人地淨係得把口,他朝人地真係有咩政策推出嚟嘅時候,又會話淨係做個樣根本就無撚用。 

 

個評論員劈頭就講:喂,布魯塞爾欠咗你香港人咩? 

 

 

德國政府反應慢嘅原因 

 

德國喺世界政局上面從來都係無「攻擊能力」的(軍事上有試過兩次嘅,結果大家都知啦),依家德國能夠做到歐盟一哥,靠嘅就係小心翼翼穩中求勝嘅策略,依家夾喺美國,中國同俄羅斯嘅裂縫之中,德國政府反應慢係好正常的,因爲佢地要望清楚個風向先,但係檯底下佢地唔係無做實事(淨係之前夠薑收中國同香港嘅政治難民其實就已經有政治代價啦),德國亦都唔係唔知中國係潛在嘅威脅,但係佢自己一個跑出嚟鬧,有咩用呢?侵侵就算幾癲都好,電視訪問啲德國官員,都係粒聲唔出㗎,都有好多德國人插佢地點解咁懦弱㗎。 

 

所以影片都有講到,依家疫情對歐盟全部國家都有重大打擊,啱啱先夠膽再行多一步,財政上再進一步融合,呢個都可以話係半個「投命狀」,就係啲大國要拉曬成個歐盟一齊,方向上要一致,之後政治上先可以行動。風都要慢慢先吹得起,五眼肯強硬,英國敢玩BNO,禁華爲,歐洲議會入面嘅投票結果,一步一步,其實我自己覺得係慢,但係個方向係啱的。 

 

你可以話佢地軟弱,要睇風向,但係你亦都可以話佢地謹慎,等到準備好嘅時候先出手。 

 

講到最後,重點係要回歸行動。大家如果有啖氣,喺每一個德國PostTweet之下屌德國奶共,倒不如針住幾個方向同政策,講有咩要快啲做,做多啲,成爲「推動輿論」嘅羣衆之一,咁對於呢件事先有實際嘅幫助的… 

 

 

延伸閱讀:  

  

  

此為石賈墨之原創文章,轉載前請事先徵求授權並註明出處 www.stegermatt.de  

  

  

想緊貼我嘅最新動態?即刻Follow我嘅FacebookInstagram  

有嘢想講?可以喺下面留低你嘅意見。 

  

歡迎隨時聯絡我了解更多  

WhatsApp:  +4917695274920  

Signal: +4917695274920  

Telegram: @Stegermatt  

   

 

 

Write a comment

Comments: 0