· 

【德國登報】《日報》《每日鏡報》- 為自由奮力而戰,與香港齊上齊落 

 

 

No photo description available. 

Kämpft für FreiheitKämpft mit Hongkong. 

為自由奮力而戰,與香港齊上齊落。 

 

今日中共建國七十週年,唔好意思,我自己唔認為有啲咩值得慶祝。 

正常香港人,都唔會有心情過呢一日。 

 

早前G20團隊以『十一國慶,賀佢老母』為題,再次推出眾籌,毫無懸念,又再成功達標。雖然眾籌嘅時候以『賀佢老母』做賣點,但係大家都知道,G20團隊同每個有份參與登報嘅朋友,都好清楚眾籌得嚟嘅資金,係來自每一個熱心支持呢個運動嘅香港人,每一分每一毫,我地都唔會浪費。雖然真係好想賀佢老母,但係我地真係要考慮清楚,到底呢一筆錢,點樣可以發揮到最大嘅功效。 

 

我同其他德國呢邊嘅香港朋友都認為,通過之前嘅登報行動,我地已經成功喚起咗德國人對香港民主運動嘅關注,如果我地要再喺媒體上創造到影響力的話,唔可以再走大方向,一定要深耕細作,深入咁探討一啲非常重要嘅資訊同觀點,等德國人更加全面咁理解香港呢一場民主運動。 

 

 

德國新聞香港頻道 

 

好彩,我七月嘅時候,就預計到德國媒體嘅報導,對於往後嘅工作,都有一定嘅重要性。所以我就開咗『德國新聞香港頻道』呢個Facebook PageTelegram Channel,主要係想有一個資訊匯聚點,等我可以好快咁睇到德國媒體有關香港嘅報導。一開始我都係自己攞曬全部德語媒體嘅Feed,然後不斷咁手動轉,後來就Setup咗個Monitor自動轉,雖然效果未必話好好,但係起碼都可以起到一個少少嘅參考作用(另:寰雨膠事錄依家有提供國際媒體新聞Digest,有人幫手做,我課金都課得心甘命抵)。如果大家想知道德國媒體對於香港嘅報導的話,歡迎Subscribe我呢個頻道。 

 

 

話說回來,自從有咗呢個頻道之後,我開始注意多啲德語媒體嘅報導...我已經睇少咗好多香港新聞,一開始係好唔習慣,但係如果我可以兩邊都關注,咁我可能可以起到一個橋樑嘅作用。等香港嘅朋友,可以了解多啲德國人嘅諗法,而當我有機會同德國媒體講香港人嘅諗法嘅時候,我亦都可以俾到一啲入肉少少嘅觀點。 

所以我花咗好多時間,睇返近呢幾個禮拜嘅德國媒體報導,比較返香港同德國嘅媒體,到底點樣睇今次嘅運動,而當中又有咩差異。 

 

我從中選擇咗兩個話題,分成兩份報導,登喺兩份比較細嘅報紙度,務求可以做到最入肉嘅衝擊。總體嚟講,德國媒體嘅報導,有時候雖然都好深入(例如話南德意志報嘅週日特刊),但係有兩個觀點,實在煲得唔夠盡,我好想掌握機會,將兩個我自己覺得好重要嘅議題,再講多一次俾德國人聽。好好彩,我搵到兩個文采飛揚嘅德國人做寫手,幫我將呢啲論點化成紮實嘅文字,喺呢度,我好多謝佢地嘅幫助。 

 

 

第一點係有關香港人道危機嘅報導 

 

呢一篇文,會喺德國嘅die Tageszeitung《日報》出現,佢地報館之前見到我地嘅報導,特意聯絡我地,話可以用優惠價俾我地登廣告。TAZ本身政治立場好鮮明,讀者有好大嘅政治能量。睇返佢地對香港嘅報導,亦都好貼地,有報導埋國際特赦針對香港人權問題嘅報告...種種原因,都令我覺得TAZ係一個好選擇。 

 

好多德國人都唔相信,香港會出現警察施行酷刑嘅情況,佢地因為見到電視畫面同報導,覺得警察暴力,就算過火,示威者都有責任。 

 

我自己堅信,核彈都唔割,唔係一個口號,而係運動成功嘅先決條件。雖然我唔割,但係德國媒體有中立潔癖,好鐘意扮中立,只要有暴力嘅場景,無論警民之間暴力嘅比例有幾懸殊,我見親嘅報導都一定會出返啲掟磚,掟汽油彈嘅片段出嚟中和返下,務求做到打和啦Super嘅效果。 

 

所以,講街頭上嘅警暴,其實效果已經唔係好大,呢篇文,就係要講醫院閉路電視影到警魔對一個動彈不得嘅老伯施行酷刑,就係要講831速龍無差別打市民加埋太子站傷者人數有問題,就係要講國際特赦都確定咗嘅新屋嶺折磨。 

 

香港警察,連Kicking a yellow object都講得出,呢位阿Sir,真係連禽獸都不如,香港警隊,已經完全腐化成外國人無法想象嘅罪惡集團。 

撕破香港警察嘅偽裝面具,話俾德國人知,香港已經唔再係大家心目中先進,繁華,安全嘅國際大都會。 

 

 

第二點係有關中德貿易關係入面嘅盲點 

 

呢一篇文,我選擇咗喺《每日鏡報》der Tagesspiegel度刊登。呢一篇正正經經講政經嘅文,點都一定要放落柏林度推。Tagesspiegel亦都係有主動聯絡我地,話可以傾落廣告嘅事宜。翻查返啲資料,佢地喺柏林嘅讀者人數,的確係最多,而且好多柏林嘅政治人物,睇報紙都係睇Tagesspiegel先。喺呢度,我當然好希望呢幾個重要嘅觀點,可以直擊首都。 

 

你話政經呢一個範疇,其實好多報紙都有講過,依家已經有政治人物開始食住呢條水,但係我覺得值得講多一次,再深入啲,再大聲啲。 

 

呢度可能大家會有啲寄望,睇完可能有啲失望。 

有寄望嘅地方:我地當然好想德國幫手『賀佢老母』。失望嘅地方係:『賀佢老母』嘅形式,可能未必好入肉。 

 

我講過,德國有好多好天真嘅人,覺得中國唔係咩洪水猛獸,如果我地一嚟就妖魔化中國,必定會引起好多德國人嘅質疑,所以呢篇文,真係針對一啲對中德政治經濟關係有注意,但係未必深入了解中國經濟版圖擴張所帶嚟潛在壞處嘅德國人。 

 

我地希望德國人都可以『賀佢老母』,但要據理力爭,講出香港嘅重要性,德國對中國過份依賴嘅問題,回歸返德國嘅外交政策,希望德國唔好再矮化自己嘅角色…尤其係,當王毅同全世界講中國係發展中國家嘅時候…我地希望德國確切考慮一下,有咩政治上嘅決定,係可以協助到香港同中國嘅民主進程。 

 

今次呢個『深耕細作版』登報行動,德國組所需要動用嘅腦汁,比起之前嘅行動,真係有天淵之別。喺度我再次感激G20團隊每一個成員,同埋喺德國嘅外國勢力寫手,設計師同其他有份幫手嘅人。我好希望大家可以繼續向前看,望住遙遠但美好嘅結局,繼續齊上齊落。 

 

最後,一個最精彩嘅結尾:原來今日十一,北京又喺《商報》賣廣告,大玩Happy birthday to me 

圖就唔出啦,一如以往,質素奇差,有時間先再俾大家觀賞一下。 

 

P.S. 呢幾日收到大量德國人負皮,唔明白點解香港人硬要用『赤納粹』比喻中共。 

 

傳送門:https://bit.ly/2mvyxf2 

 

我只係提出自己觀察,呼籲大家停用呢個十分之有爭議性嘅比喻。言論一出,有好多人原來都唔滿意。有人話我似TVB審查香港言論,有人話德國都幫唔到手,更有人話我係分化撚。 

 

嗱,我係好樂意接受大家批評,但係質疑我立場,我覺得真係好可笑,我喺德國呢邊做得幾多得幾多,大家有眼見,成果都未有,就見到赤納粹呢個講法,幫我倒緊米。話德國無L用嘅講法仲好笑,唔通你大叫中共係赤納粹就好L有用?EU ParlResolution嘅議員,係德國人;同中國貿易最多嘅歐洲國家,係德國。無用就唔做?咁我又應該做咩呢大佬? 

 

 

延伸閱讀:  

  

  

此為石賈墨之原創文章,轉載前請事先徵求授權並註明出處 www.stegermatt.de  

  

  

想緊貼我嘅最新動態?即刻Follow我嘅FacebookInstagram  

有嘢想講?可以喺下面留低你嘅意見。 

  

歡迎隨時聯絡我了解更多  

WhatsApp:  +4917695274920  

Signal: +4917695274920  

Telegram: @Stegermatt  

 

 

 

 

Write a comment

Comments: 0