· 

【德國登報】《法蘭克福匯報》- 香港正在淪陷,自由最後一戰! 

 

 

 

 

奇跡,喺六月二十七日嘅《南德意志報》上面,發生過一次。 

 

今日,即係八月十九日,《法蘭克福匯報》政治版首頁,再一次出現一封由香港人發出嘅公開信。* 

 

標題係: 

Hongkong fällt. Der letzte Kampf für die Freiheit. 

『香港正在淪陷 自由最後一戰』 

 

 

香港人的奇跡 

 

同樣地,今次我繼續肩負聯絡報館嘅責任,亦都因為上一次嘅參與,今次順其自然,ViSdP後面都係出我個名。雖然上一次我已經講過,但我都不厭其煩再講多次:我名有幸可以出現喺公開信上面,但係我自己無咩功勞,背後成個團隊,包括翻譯,校對,設計,協調,等等等等,先係公開信可以成功出現嘅原因。喺度,我再感激G20x攬炒團隊,再次創造奇跡!希望各位香港人唔好放棄,全世界都注視緊香港,我地一定要繼續堅持落去! 

 

*:晨早,打算去火車站買份FAZ,點知話今日收唔到,我周圍問極都買唔到原來呢幾日德國天氣反常,一間印刷廠不幸被雷劈中,FAZ只能印出大約一半數量嘅報紙。不過FAZ立刻免費開放網上版大眾閱讀,而且答應聽日八月二十日)會喺盡量前嘅頁面再幫我地登多一次,其實就真係接觸曬唔同階層嘅德國人!今次真係連雷神都要眷顧香港人! 

 

 

香港人的覺醒 

 

重要嘅嘢講完啦!喺度,我想講下我自己感受 

 

香港人,無論海外海內,喺呢兩個月,展現咗佢地不屈不撓嘅一面,接二連三咁創造奇跡。每一次,我都亦悲亦喜。 

 

開心嘅係,我終於見到香港人潛藏於心,對於自由民主嘅追求。好多香港人,雖然平日無聲氣,好似淨係掛住搵食。但係今次大是大非之前,好多人都已經覺醒,直接間接參與呢活動,令到我地知道,同路人並不孤單。 

 

傷心嘅係,我地全部人打從心底裡,其實根本就唔想創造奇跡。尤其係我呢啲去咗外國嘅人,仲有咩要求啫,都係想平平淡淡咁繼續生活 

 

元朗黑夜,警黑合流,當時我覺得,香港嘅政權已經突破咗道德嘅底線,正式步入徹底腐敗嘅第一步。當時我出Post講過,『我為自己許下一個諾言:香港呢PK政權一日唔倒下,我都會竭盡所能,用盡我僅有嘅時間同精力,奉陪到底,同你鬥長命。』 

 

雖然我講呢句嘢,好想自己無咩情緒。但我承認,其實我係有一絲埋藏喺心底裡嘅怨恨。 

 

點解 

我好好彩,喺今次反修例嘅革命牽起之前,我地一家三口,喺西貢渡過咗一個好美好嘅假期。同屋企人過年,同朋友約食飯,同老婆仔仔行街。我地當時完全唔知道,原來呢段美好時光,已經係香港年輕人同政府,同警察,同建制,同舊時代割離關係嘅最後倒數。 

 

 

 

已經返唔到轉頭啦。 

 

好多人講。 

 

係。催淚煙終會消散,但係嗰一層毒害人體嘅微粒仲會永遠殘留喺香港嘅一街一行。 

係。眼上嘅傷口總有一日會愈合,但係失去咗嘅視力,仲會伴隨住受害人嘅一生。 

係。呢極權政府可以繼續打壓,繼續派糖打經濟牌,扮成若無其事,但係警棍打過嘅後生仔,傷不在身,而係打碎佢地對香港未來嘅憧憬同夢想。 

返唔到轉頭㗎啦。 

 

搞咗咁耐,我都無好細心咁睇呢份公開信今晚我開返份嘢出嚟,仔細望加上我諗到呢度,好清楚返唔到轉頭呢樣嘢,已成定局,手開始震,眼淚一路咁流。人,好多時候都係一件事而引起,但係唔係,呢種憤怒,係一種混合住悲憤,痛心,無助嘅感覺。 

 

呢一種感覺,我一早就有,望住公開信上面煙幕瀰漫嘅香港,先至會突然無限放大。 

畀返個香港我。 

我要你畀返個香港我! 

...我知,講係無用嘅。 

 

依家你到呢Post嘅時間,我去完Stuttgart一趟。去Stuttgart嗰目的,係搵Dietrich Wagner同佢做專訪,仲會搵埋德國嘅水炮車法律專家。我要全世界都知道水炮車有幾危險,幾唔人道!而偏偏香港警察都仲要用! 

 

今晚我都已經開咗一個會,同其他有心嘅香港人一齊,行開始建立一個e.V.嘅第一步,我好希望喺德國,香港人都可以有一個代表到自己嘅協會。 

仲有好多嘢,我同埋好多喺德國嘅香港人都做緊。時機成熟,我會話大家知,希望大家到時可以盡力參與。 

 

我唔會停,到有一日你畀返個香港我,我先會收手。 

 

 

延伸閱讀:  

  

  

此為石賈墨之原創文章,轉載前請事先徵求授權並註明出處 www.stegermatt.de  

  

  

想緊貼我嘅最新動態?即刻Follow我嘅FacebookInstagram  

有嘢想講?可以喺下面留低你嘅意見。 

  

歡迎隨時聯絡我了解更多  

WhatsApp:  +4917695274920  

Signal: +4917695274920  

Telegram: @Stegermatt  

   

 

Write a comment

Comments: 0