【時代革命】光復香港，時代革命 - 德文應該點翻譯

尋日上網見到林鄭月娥開記者會，發現林鄭月娥終於同『港獨之父』梁振英齊名，成為『港獨之母』。

我聽到佢竟然親口同香港嘅市民講：光復香港，時代革命！

果然不愧係香港嘅第一領導人，講嘅時候，剛中帶柔，字字鏗鏘，一字一頓，饒有氣勢！YouTube更加有人製作成兩小時版本，真係百聽不厭，繞樑三日！

作為一個德文老師，有香港人走嚟問我，到底『光復香港，時代革命』呢句句子，可以點樣翻譯呢？

喺呢度，我地首先一個一個字去分析。

首先係光復

學術上，有來自拉丁文嘅Retrozession，意思係好深入。不過大家嘅理解，係要從權貴手上奪回香港，所以我覺得一定要用動詞，同埋要夠入世。

我考慮過wiedergewinnen，zurückgewinnen，zurückerlangen，zurückerobern。

睇返可分割動詞嘅動詞部分先。

Erobern有『攻下』嘅意味，略嫌暴力，所以排除。

Erlangen其實我都覺得好好，不過字面上有『攞』嘅意思，無強調香港本身就已經屬於香港人。

而且zurück喺呢度作為可分割動詞嘅詞頭，同副詞一樣，有『回』嘅意思，意思上雖然配合到『奪回』，不過都有『回頭』嘅意思，唔夠吉利。

最後我都係選擇咗wiedergewinnen。Wieder有『再次，重新』嘅意思，比較正面，而且用gewinnen，有『贏』嘅意味，成個翻譯，就可以當成『我地要重新贏得香港』嘅意思，我自己覺得幾合適。Duden都有一個例子：die wiedergewonnene Freiheit genießen

可見呢個字配合『自由』或者其他權利，係十分啱用的。

香港

唔需要翻譯啦，Hongkong，記住德文係一個好多複合詞嘅語言，所以兩個字係連埋一齊寫的。

然後係時代

時代同樣有好多個字可以考慮，Epoche，Ära，Zeitalter，Abschnitt/Zeitabschnitt都係可行選項。

其實Epoche係意思最接近嘅翻譯。Ära有少少『世代』嘅意思，Zeitalter多數用喺歷史方面，bschnitt/Zeitabschnitt就多數講人生。

不過我最後都選擇咗Zeit呢個字。你可能會話，Zeit唔係淨係時間咩？

根據杜登嘅講法，呢個亦都可以字可以解成 Zeitraum, Zeitabschnitt des Lebens, der Geschichte usw. (einschließlich der herrschenden Verhältnisse)，所以用嚟講創造新時代，自然無問題。

其中一個Duden俾出嚟嘅例子係Das waren böse/finstere Zeiten同埋Sie ist ihrer Zeit weit voraus。

最後係革命

可以用嘅字，有Revolution，Umsturz，Aufstand。

其實跟返英文都有嘅Revolution，係最適合㗎啦。呢度我唔用動詞，因為如果你話革命做動詞，又係有『搞』革命嘅意思。事實係，香港嘅新一代已經覺醒，知道自己嘅將來緊握喺自己嘅手入面，呢個覺醒，已經係一場革命，並無人攞槍炮嚟搞（唔好意思，其實係有鐳射槍的）。

到最後，將呢啲詞語合拼，加返個Genitiv俾佢，就得出。

Hongkong wiedergewinnen, Revolution unserer Zeit.

中文意思係『贏返香港，呢個係我地身處嘅時代嘅一場革命』。雖然同『光復香港時代革命』學術上未必完全意思一樣，但翻譯口號，最忌迂腐，用字最好都係簡單直接，朗朗上口。

小弟德文水平尚屬一般，如有更佳翻譯，請留言告知！