【德國登報】千里送鵝毛？「齋同」特快速遞

No photo description available.

為咗達成喺德國登報嘅呢個目標，所有有份參與嘅人，都已經身心俱疲…我本來講話要俾其他人接力，爭取返啲時間休息，陪屋企人同照顧返我自己個眾籌最後幾日嘅安排…

講就咁講囉。

報紙收集員

下個星期二，香港嗰邊打算整返一個展覽，俾喺香港嘅朋友睇返世界各地嘅報章廣告。呢一個由一班香港人創造出嚟嘅奇跡，真係要用心紀錄落嚟。

咁搞展覽，前提當然要有世界各地嘅報紙啦…

本來之前有人話香港有間酒店可能有SZ，但原來酒店只係有電子版，然後印出嚟俾啲客睇。咁即係要有人寄返去香港…我以為有人會有買多幾份，可以寄到返去，但好多人都怕買得多，德國人反而無得睇，所以買親都係一份起兩份止…

啱啱好今朝SZ個廣告部負責人寄咗六份報紙俾我，我收到嗰下，都呆咗…佢地本來話會俾兩份我留底，點知一嚟就俾六份我。我就問下香港嗰邊解決咗個問題未。原來係未嘅…咁就麻煩啦…

報紙速遞員

好，計下條數，如果今日，即係星期五寄，咁到星期二，有三日時間喺中間，但係又夾住週末，我都唔清楚寄唔寄得切。不過傾緊呢個問題嘅時間，已經係德國下午三四點，呢邊啲郵局好多時候五點就收，咁我話唔理寄唔寄得切，我速速寄出去先再算…就嗱嗱聲飛去郵局…同我二十七號飛去火車站買返嚟一樣，不過今次係飛去郵局寄出去…

去到郵局，我就同佢講我想寄速遞返香港。我問佢有幾耐時間…佢話兩日到四日啦…香港的話應該唔需要四日。咁我就話好啦，星期二應該到。『唔好意思，Offenburg呢度，星期五三點半就出車，你依家寄，我地要星期一先可以幫你處理。』Was！我叫咗出嚟…望住個鐘，真係好懊惱點解唔早一頭半個鐘出門口！

佢話你打去DHL啦…佢地話DHL有第二啲速遞服務，咁我又即刻打去問。對方知道我情況之後就話，急的話，我地可以專人嚟收，一日之後到香港。

哦…好呀。

價錢一千五百歐羅起…

X，唔係掛…

佢話，聽到個價錢，突然之間又唔係咁急啦喎係咪呀…佢把口都幾賤下，我鐘意。

我苦笑，同佢講星期二到都可以。佢其實都好好人，即刻幫我搵有咩可能性…佢話附近有一個速遞中心，夜啲先出車，不過如果我想確保今日可以寄得出，都係最好五點之前到…佢俾咗個地址我，揸車過去，要上歐韜班，大約半個鐘多啲嘅車程…

報紙賽車手

我望下個鐘，大佬，依家四點半啦喎…此刻電話傳來追魂Call，我老婆本來出咗去，話仔仔唔知天氣熱定點，發脾氣，佢地要返屋企…其實即係我都應該返。

本來尋日同佢講話依家目標達成，應該無會咁忙咖啦…我掙扎咗一陣，同佢講：我依家返唔到嚟住…然後就直鏟上歐韜班。

德國有樣嘢好，就係舉世聞名嘅Autobahn，好多路段車速都無任何限制。我自己舒舒服服，揸開130左右，要快少少就150，都真係好夠。

但係今次我真係驚趕唔到，所以俾足油，揸到170，我架老爺車開始震動…不過呢段路有好多修路工程，我想快，都係快得嗰一時三刻。結果，我就係五點左右到…

我攞住疊報紙，又係要衝入去個Counter度同佢講我想寄特快速遞，要快。

佢望住仲喘緊氣嘅我，問我想寄咩，感覺有少少唔耐煩。

『齋同。』德文嘅報紙係叫Zeitung，廣東話真係讀成齋同。

『齋同？』佢面部表情由唔耐煩，變做黑人問號表情。

我知佢諗咩，過期報紙，同廢紙無咩分別，南德一份賣三歐，你俾十幾二十倍價錢速遞啲廢紙，做咩托？

我同佢講要寄去香港。

佢都係望住我…我就直頭揭開第五版俾佢睇，佢睇咗一陣之後，就慢慢開口：電視我都有睇到，香港依家有好多人示威，係唔係？

此時此刻，佢語氣已經好咗好多。

由於已經解釋咗N咁多次，所以我又用最快嘅速度，同佢講逃犯條例。講完之後，同佢講埋要做展覽呢個原因，所以先要『寄廢紙』過去。

佢無出聲，就直接幫我打曬啲資料…打打下，佢講話應該寫內容係咩。咁我咪話報紙囉…

佢話我要查一下個系統先，未必可以寫報紙落去。

我不解。佢話：如果寄去中國，係唔可以寫報紙㗎…寫咗報紙的話，好大機會海關會扣起。不過我都知，香港同中國係唔同嘅…得，系統話香港可以寄報紙。

我加多句：遲啲香港寄唔寄到，我都唔知…

我心諗，就連寄報紙呢個動作，都已經可以折射到點解香港人會將反對逃犯條例直接叫成『反送中』嘅原因…一個連報紙都怕嘅國家，你點能夠相信佢嘅司法制度呢？

請大家繼續支持#FreedomHK！