【石賈墨】黃色德文補習社？

No photo description available.

買咗好多書，都仲未睇，有朝一日我好希望呢啲書，唔需要再放喺屋企 - 而係放喺補習社度俾我啲學生睇！

德意志黃色經濟圈

依家香港人不斷咁講黃色經濟圈，甚至有人講方舟計劃，可能有少少誇張，但係如果可以建立到一個小小嘅「德意志黃色經濟圈」，等有需要嘅香港人可以學好德文，融入德國，其實都未嘗唔係一件好事。

要完成我提及嘅三年計劃，我先要做好自己本分：教德文呢一個副業，將會成爲我嚟緊嘅主要事業。

我教德文嘅形式，將會分開三條路線。

一，重新用新模式推出影片課程。小弟之前嘅衆籌計劃，有幸得到好多朋友支持，所以終於開咗個頭。原本我打算最少每兩個禮拜製作一段教學影片，俾有興趣學德文嘅朋友睇，上年因爲香港突如其來嘅運動，加上自己身體經常出毛病（十二月真係有幾個禮拜講兩句嘢就要咳三聲，勉強錄影結果剪咗成個鐘都剪唔走啲咳聲），製作進度嚴重落後，好對唔住啲支持我衆籌嘅朋友，我嚟緊會重新思考一下個課程框架同製作模式，好快就會公佈新一輪影片課程嘅計劃。

二，重新開設小組班。其實我今年年頭都有教小組班，不過因爲返咗香港，又要湊仔，時間太難遷就，結果就決定轉型推出影片課程。既然依家我嘅正職變成係教德文，咁好自然都應該安排返新嘅小組班，暫時我考慮會推出一系列爲期十二堂嘅德文課程，幫學生由零基礎，推到上瞭解德文基本嘅語法同對話，可以有基礎應付到A1考試。時間就係每一個星期上一堂，每堂個半鐘，人數大概係四到六人成團。至於其他課程，例如話分級試嘅考試準備班（A1同B1因爲係移居同入籍要求，所以都好多人想考好），就會視乎大家嘅反應，如果夠人的話，我都會考慮開。

三，喺德國搞密集課程。呢一個學德文嘅選項，我相信係最貼近我理想嘅一個實踐。

今年三月尾，我將會搞一個爲期兩個禮拜嘅德文課程——地點？喺Offenburg。唔知道大家有無興趣，不過依家第一個Pilot課程已經額滿，如果到時參加嘅學生認爲呢一個課程嘅形式係幫到佢地學德文同埋理解德國生活的話，我會繼續搞，直到我可以轉型成爲一間實體補習社爲止。

三年計劃

我一個人嘅能力同時間都好有限，而我呢個三年嘅計劃，本來絕對需要我全心全力去經營，但係我自己都想投放返更加多嘅時間去參與德國戰線嘅工作。舊年嗰種「放工返屋企返工」嘅生活，我無咁嘅條件繼續過。所以我只能夠壓縮自己嘅工時去做。

如果大家認同我嘅理念同工作的話，我好希望我花喺德國戰線嘅「工時」，可以轉化成大家對我支持：如果你地想學德文的話，請留意我嚟緊嘅公佈，希望到時大家可以大大力懲罰我呢間黃色補習社！當然一開始我唔祈求可以賺返我以前返工嗰份糧啦…但係我相信一開始，慢慢做，補習社基礎會越做越好！

依家無撈工程，手停口停，但係之前又積壓咗大量工作，好想做埋佢，所以嚟緊我都唔會重回全職工作嘅生活，可能會先開兩三班先，Cover到我每月嘅生活支出就算，之後先會慢慢睇點樣可以爭取更加多嘅收入，放埋一邊，將盈餘轉化成爲「德意志黃色德文補習社」嘅前期投資，咁我之後就可以無後顧之憂咁投身落去做。

我人唔喺香港，喺德國做到嘅嘢好有限，但係有幾個目標，我自己覺得真係好重要，覺得一定要盡力做。爲咗可以繼續做落去，我必需要將我自己嘅事業同香港結合起嚟，呢個過程，我相信一啲都唔容易，亦預計自己喺嚟緊嘅三年會經歷好多挫敗同錯誤，喺度我希望可以得到大家嘅支持同體諒！