【石賈墨】「石氏級」教學終於有新成員：聖馬田割袍贈丐嘅故事，講嘅就係分享

石賈墨教學團隊多咗新成員，隆重介紹：Holly！

其實呢，我已經J咗Holly好耐㗎啦…

…唔好意思，標題黨咗，不過畀我講咗聖馬田嘅故事先！

尋日1111，唔係咩嘢光棍節，對於英國人嚟講最重要可能就係和平紀念日，但對於德國人（尤其係小朋友）嚟講就係「聖馬田日」Sankt-Martins-Tag。

相傳聖馬田本來係軍人，喺公元三百幾年左右駐守法國北部一個叫亞眠嘅城市，有一日佢騎馬經過城門嘅時候，見到一個赤裸嘅乞衣，佢於心不忍，就用佩劍將自己嘅大袍一分爲二，畀咗一半畀呢個即將凍死嘅男人。之後嗰晚耶穌託夢畀佢，身穿半件袍，受到啓發之後決定成爲修士。之後佢死咗落葬嗰日，就成爲依家嘅聖馬田日，德國嘅小朋友夜晚就會攞住啲燈籠周圍走。

尋晚我都同我個仔攞住燈籠，喺條街上面走嚟走去，唱下歌，睇下其他燈籠，不過真係好凍…

好啦，講返Holly先，頭先我話J咗佢好耐，等我解釋返，費事唔小心震驚咗八百萬人就唔太好啦。

句句子應該咁講：「我好耐之前已經有一個夢想，就係可以收到徒弟，將我嘅理解式德文教學系統延續落去」

放心，我都淨係話「延續落去」啫，未敢講發揚光大。

有樣嘢我唔知道大家同我有無同一樣嘅同感，其實我幾十歲人，都覺得自己大唔透，做好多嘢都好草率，好直接，雖然會考慮好多嘢，但其實都覺得自己唔夠成熟。

係呀，就算係畢業做嘢，結咗婚，生咗仔，起埋屋，喺德國開埋自己公司之後，其實都唔覺得呢啲嘢，係啲咩特別嘅「成長」Milestone。

真係覺得自己終於有返少少「大人Feel」嘅嘢，其實反而係其他比較細微嘅嘢。

其中一樣，就係「請人」。

理論上，自己開間公司，就可以話自己係CEO，老闆，點吹都得。但真係搵到Team member嗰下，會發覺自己責任大咗好多。

首先，自己一個人做一個Project的話，賺多賺少無咩所謂，但要出糧畀第二個人，就係另一樣嘢。但更重要嘅係，Leadership真係要學。

Holly話「教德文同教跳舞係兩個唔同嘅世界」，咁其實我都想講「教德文，同教人教德文，原來都係兩個唔同嘅世界」。要點講到人地明你講嘅嘢，而令到佢可以令到人地明佢講嘅嘢，真係好有Inception嘅感覺。

但係Holly都pick up得好快，因爲佢做嘢好細心，而且要跟嘅嘢都跟得好足，所以我覺得我地今次推出呢個A1嘅課程，將會對於

作爲Mentor嘅我，對於作爲新手導師嘅Holly，同埋對於好多想開始嘗試學德文嘅朋友，都會係一個充滿挑戰嘅旅程。

有興趣學德文的話，埋嚟睇睇！

PS 其實我地未真係見過面，一路都淨係網上見，嚟緊真係要搵個機會一係上去科隆搵佢一係就要佢落黑森林搵我😁