【石賈墨】歌德學院專訪系列#3：成功需苦幹

相關文章：【石賈墨】歌德學院專訪系列#2：一分耕耘一分收穫

喺第三篇專訪裏面，石賈墨將會同大家分享佢喺德國讀大學嘅心路歷程，同一啲德國讀書嘅貼士。大家會好好奇，究竟德國讀書嘅經歷為佢帶嚟咩嘅得著。

除咗財政考慮之外，仲有咩其他原因令到你決定嚟德國讀書？做決定嘅時候，你又知唔知道自己想讀咩同喺邊度讀？

問得好。你要知道，做一個影響一生嘅決定，並唔係單單靠一個原因去支持。當初我都有考慮咗幾個因素…我上一次都有提起過：我去外國讀書嘅夢想啦，我女朋友啦，我嘅事業啦，等等等等。我當時諗得最多嘅，係呢一條問題：我去德國讀書的話，相比起我喺香港讀書，會唔會令到自己有機會達成一啲喺德國先做到嘅目標呢？呢條問題，諗深一層，就係問緊自己，其實我想讀啲咩。

好好彩，我好細個就已經知道自己好想做工程師——咁你諗下，工程同德國，仲唔係一個夢幻組合？

至於你話去邊度讀書，當初真係無咩頭緒，需知德國都唔係話好似香港咁細，要揀喺邊度落地，真係有難度。不過到最後，其實命運已經幫我選擇咗。早十年八年，德國仲未有好多德文課程，係唔要求你入學嘅時候就已經識德文。咁我一搵，就發現原來Mannheim有一個國際課程係啱我心水嘅，真係fit曬。
 

德國唔似香港，無咁多高樓大廈。所以喺Hochschule Mannheim校園中心嘅教學大樓，大半個Mannheim都見得到。我知，上緊堂，其實就唔應該發吽哣，淨係望出窗外，不過上到去最高層，風景真係幾迷人下。
 

你嚟德國讀書，有無咩特別要符合嘅條件？駛唔駛識少少德文，或者要考試？

好彩唔駛。我當初報名嘅時候得一個條件：就係要識英文，咁我當初喺中大讀咗一年書，都係用英文嚟讀，佢地直頭已經將呢個條件當成英文水平嘅證明，我連英文試都唔駛考。

喺Mannheim我讀嗰科係有啲奇怪…嚟德國，應該讀德文啦？外國人，凈係識英文喎！結果呢個課程就係『瀨尿牛丸』：第一年，全部堂都係用英文上，俾啲學生適應下德國生活先。到第二年就將所有嘅國際學生同德國本地學生撈埋一齊，全部科目，上堂又好，筆記又好，一下子就變成德文。

而德文試，我的確要考，一係考DSH，一係考TestDaF，不過學校到你畢業之前先會問你攞證書。本來佢地希望係第一年過後就要啲學生即刻考，不過差不多無一個學生做到呢個境界。我自己係第四個Sem，做完實習嗰時考嘅。

依家想嚟德國讀書，比起以前門檻低咗，好多時候都唔駛諗點樣學德文，好多課程都係純英文教學。我自己其實覺得有啲可惜，因為呢種先英後德嘅模式，真係令到好多學生一開始無咁大壓力，但係又可以慢慢逼到自己學到德文，畢業之後真係比較容易融入德國。

由Heidelberg去Mannheim，要轉兩次車，首先係由屋企去Heidelberg個火車站，然後再去Mannheim個火車站，最後一程就係去大學度。我已經經歷過無數次因為趕唔上一班車，而要喺車站苦苦等待下一班車嘅痛苦。

你覺得喺德國大學讀書，有咩挑戰？

挑戰聽落好似好困難咁，其實又唔係嘅。我覺得喺德國讀書同喺香港讀書，有幾樣嘢好唔同，一開始真係要啲時間適應。

第一位，一定要講自由度。考試同做Lab自然走唔甩，除此之外，教授對你真係零要求！無必交嘅Assignment，無計分嘅測驗，你嚟唔嚟上堂，佢都係唔會理你，唔影響你個Grade。
聽落真係好爽，不過喺咁嘅環境讀書，少啲自律性都唔得。好多同學都係因為咁，玩到心散曬，最後想追都追唔返。

另一點係教授嘅教學內容，德國呢邊啲教授，唔興用參考書，佢課堂教咩，係佢自己決定，好睇佢研究開啲咩，同埋覺得咩題目重要啲。我仲好記得當初讀第三個Sem，全部嘢轉曬做德文，為咗明白教授講嘅嘢，不論中，英，德，不論係網站，電子書，定係網上搵得到嘅教學影片，通通照殺，如果唔係真係無可能解得自己明。

好多人都知道，德國高等教育學院有分Hochschule同Universität，前者有啲似理工學院，的確係比較注重實戰經驗。我學過嘅理論，依家你問返我，好多都還返曬俾教授。但係教授講啲實際做嘢會用嘅知識，我依家諗返，真係覺得幾有用。如果你自問係一個鐘意實作嘅人，咁嚟德國讀書，相信Hochschule會啱你多啲。
 

要畢業，大學仲有一個要求，就係要上好多唔同嘅Seminar，咁學生都可以練埋所謂嘅Soft skills。有一個Seminar嘅講者，錄低咗我介紹香港旅遊景點嘅演講，等我地之後可以即刻分析。呢啲同德國人，外國人嘅文化交流，我覺得真係十分有趣。

咁你讀書嗰時住邊？你又點樣搵生活費？

所以話一切都係整定，我老婆當時啱啱喺Heiderberg讀緊書，而Heidelberg同Mannheim距離，大概係二十五公里左右。搭火車來回，都叫可以接受。而雖然喺德國讀書唔需要畀學費，不過生活費都好重皮，例如話交租或者買下日常用品，買下餸，都已經要駛好多錢。

我喺德國讀書嘅生活費，大部分都係嚟自打工嘅收入，讀書時期係差不多無間斷咁打，一有機會就搵工開，就算你話放Sem break，都一路係返到盡。更加唔需要講話做實習啦，喺德國讀工程，做實習係畢業嘅條件之一，全部學生都要做㗎。

我依家數下手指，原來我未畢業之前，已經喺成五間公司度打過工。我自己覺得，呢啲打工嘅時光，分分鐘仲緊要過我自己讀嗰個學位…做嘢嘅時候，真係可以累積到實戰經驗，對將來搵工，有莫大幫助。

德國人有個講法，『Es ist noch kein Meister vom Himmel gefallen.』意思即係『大師從來唔會從天而降』。大師級嘅能力，唔係與生俱來的。如果想做一個專業嘅工程師，淨係讀死書係唔夠㗎，自己仲要落手落腳做。所以我都誠意推薦，如果讀書嘅時候有機會可以打工的話，千祈唔好錯失良機。
 

我讀得國際課程，自然就差不多淨係得外國學生做我同學啦。呢張相，係一開始同同學去Heidelberg餐館古堡嘅時候影嘅…依家睇返，其實都幾傷心，因為呢張相上面嘅學生，得幾個係成功畢到業。

講到最後，決定咗嚟德國讀書，你覺得有咩得著？畢咗業之後，有無即刻搵到工？

講得著就真係多囉！我讀個學位，差不多成個雙學位咁濟。淨係讀啲工程嘢，都已經夠難，再加埋學德文，德國文化，新嘅生活模式，真係好攞命！但係『大難不死必有後福』，大家成日聽人講“What doesn’t kill you makes you stronger“，其實係德國哲學家尼采講㗎！

讀咗咁多年書，最後唔係淨係攞到個工程師銜頭咁大把：我學咗一種新嘅語言，體驗咗一個令人著迷嘅文化，亦學會咗點樣同德國人一齊共事。

我唔想認威威，不過，你都知道德國依家都好需要工程師…其實，我唔係一畢業就搵到工，而係未畢業之前已經搵到。

好多學生，都會喺最後一個Sem就已經開始搵，咁我當然都唔執輸啦，搵埋一份。間公司喺見完我之後，好快就已經決定要請我，到最後佢地係連我張畢業證書都無攞嚟睇。

講到做嘢，最緊要都係做到成績出嚟俾人睇。張Cert，其實都只係紙一張啫！
 

呢疊筆記，我讀過曬，部分更加係我自己寫…但係呢個分量，其實講緊係四個Sem，即係成個課程嘅一半咁大把！無辦法啦，如果要用一個自己未係好精通嘅語言去學一啲抽象嘅概念的話，一定要用返中文同英文嚟做輔助。好彩，讀工程，考試嘅時候要寫數字多過文字，如果唔係都幾惡啃！