相關文章：【石賈墨】歌德學院專訪系列#1：萬事起頭難
喺第二篇專訪裏面，石賈墨將會同大家分享佢學德文過程中嘅悲與喜，苦與樂。
其實德國已經有好多人識講英文，德國嘅大學亦都已經有好多英文授課嘅學位。點解仲要學德文呢？
啱，你講得啱，好多德國人都識得講英文，不過係唔鐘意講咁解。我嗰時入學，去咗學校個註冊處度做手續，我問嗰位負責嘅女士『Do you speak English?』佢就冷冰冰咁講咗一個『Nein.』字…連No都唔肯講，你話慘唔慘。
講到底，學德文係對德國文化嘅一種尊重。而語言又同文化息息相關，如果你想真正融入德國呢個國家，咁你就無可能唔去學好德文。更加唔好話你想留喺德國生活，平時生活，買嘢，同其他人溝通，唔識講德文已經好麻煩啦！
仲有喎，唔好唔記得，我老婆都係德國人。上一次已經講咗愛情嘅威力有幾大啦！咁學自己另一半嘅母語，都正常不過啦，係咪先？
如果屋企人係德國人，學地道德文嘅機會就多啦。你可能連本書嘅書名都睇唔清楚——唔關你識唔識德文事，而係呢種叫『Fraktur』嘅字體，因為難睇，依家已經無咩人用。
不過相比起唱德文聖誕歌嘅難度…其實Fraktur都好容易㗎啦
當一個人學過英文，學習德文會容易啲，因爲喺德文裏面有好多 - 而且越來越多英語化嘅字詞。加上德文有好多字詞同英文好似。咁對學德文有無幫助？
當然啦！Terry你都學過德文，都知道德文同英文可以好似樣。
好多人都知，德文同英文都係屬於西日耳曼語系，兩種語言就好似兄弟咁，所以兩者相似都好自然。不過似，唔代表學起上嚟就容易啲，我自己經驗係有好有唔好。
如果你識英文，但係唔識德文的話，睇睇呢句德文句子：„Ich habe das
Foto mit der
Kamera in der Universität gemacht.“ 我上咗一個禮拜德文堂，都大概估到呢句句子講咩。你睇下啲名詞，同英文差唔多一樣。
但係要小心喎，德文同英文嘅相似性，有陣時係地雷，唔小心直接攞嚟用，好容易中招，搞笑嘅例子有：
我一開始以為Chef係廚師啦，但係Chef德文係老闆咁解，唔會幫你煮飯的…Gift，一定係禮物啦掛？原來德文Gift係毒藥咁解…咁真係唔好送Gift畀人…我由以為Objektive係目標，原來唔係，德文Objektiv係鏡頭咁解…
所以我呼籲大家，唔好覺得口爽就直接攞呢啲英文字嚟用，做人都係小心啲好。
教學相長，呢個講法，珍珠都無咁真。我學咗德文無耐，就已經開始試下幫其他人學德文。
愛恩斯坦講過：『一樣嘢，如果你唔可以簡單咁解釋到，即係你仲未夠明白。』
德國人連自己都會話，德文好難學。你認唔認同呢？
你喺學習德文過程中覺得最困難嘅係乜？
特別係對我地香港人嚟講，德文真係好難，就算學過英文都係咁話。我覺得一開始最難，真係德文嘅文法。
大家可能唔多覺，但係其實廣東話無咩所謂嘅文法，一個字，唔會話語境變咗，就會多一點，少一撇，一個字就係一個字。所以一開始，點樣理解『ich』，『mich』，『mir』呢三個都係翻譯成『我』嘅德文字，已經令到我一頭煙。
啱啱學，真係覺得德文好有性格…真係有『性』同『格』，呢兩個概念，香港人都好難理解…德文有咩難，就唔係淨係有性格咁簡單，其他難嘅嘢，我同你講到聽朝都仲有得講！
我好鐘意同啲學緊德文，尤其係學緊『與格動詞』(Dativverb)嘅朋友，講一個同老婆之間嘅小插曲：零九年我喺中大開始讀德文，學咗『helfen』呢個動詞，即係『幫助』嘅意思，咁我就講『Ich helfe dich』而呢個講法係錯嘅，要講『Ich helfe dir』，因為helfen係與格動詞，之後要跟與格名詞嚟用。咁我當時唔知，當然第一時間去問我老婆啦！佢話：吓，我唔知喎，德文就係咁㗎啦！我心諗，講呢啲？
人生有幾多個十年！十年前，我一開始啱啱學德文，有人同我講，話用熒光筆劃字，可以幫你學詞性…結果我買熒光筆買到差啲破產，最後都係無咩幫助。
有乜原因令到你愛上德文依個語言？你可唔可以分享下你學習過程中嘅成功同失敗事例？
我好鐘意德文有『複合詞』，我叫複合詞做『林敏聰式名詞』。點解？因為佢好似林敏聰玩獎門人嘅時候諗出嚟嗰支『毛筆』：『蘇格蘭場非工業用國際線路自動融雪…毛筆一支』咁你知唔知德文文學界入面最長嘅字係邊個呀？係
Donaudampfschifffahrtselektrizitätenhauptbetriebswerkbauunterbeamtengesellschaft，寫字的話，一行係放唔落的！
當然德文平時啲複合詞無咁長。我本身係工程師，第一次見德文『Zahnrad』呢個字，雖然未學過，但係睇落我好似知佢點解，Zahn係『牙』咁解，而Rad就係『轆』咁解，咁咩係『牙轆』呢？…諗真下，我心入面就啊一聲，Zahnrad，『齒輪』是也！如果你無學過英文Gear呢個字，你係成世都唔會睇得明的。好多德文嘅複合詞，中文都係咁樣組成，所以學呢啲字嘅時候真係好驚歎，點解兩者暗地裡可以咁相似，未學過都自然識，係好玩的。
其實學德文嘅過程，自己嘅自信有時真係好似過山車咁，上上落落。第一次覺得自己成功掌握到德文嘅時候，係做完實習之後嘅演講。喺德國讀工程，全部學生都要實習半年的，咁實習完就自然要寫份報告，同教授，其他同學匯報下你做過啲咩。嘩，為咗準備個演講，真係如臨大敵，早幾個禮拜就寫定稿，俾人改好，自己再不斷練習，直到自己真係可以用呢個陌生嘅語言，深入咁講一個學術性嘅題目出嚟，演講前一日，真係覺得自己白頭髮都多咗幾條！好彩，我個教授好好人，睇得出我準備充足，又講得佢清楚，所以都好滿意，俾咗1.0我…唔係GPA呀，德國計分，係1.0最高的！所以收到成績嗰下，真係成個人開心到彈起！覺得自己已經征服咗德文啦。
咁當然我都灰過機啦！一開始返學要搭火車，火車站啲廣播，質素已經差，啲廣播員講得又快，我點可能聽得明呢。結果？落錯車，如離開了幸福的高速路…搭搭下，忽然覺得出面啲風景好似同平時見開嘅有啲唔一樣喎…然後就要搵路返屋企，到返到屋企，天都黑曬，個人都散曬，知道自己德文差，唔怨得人，真係灰到暈…
讀書啲筆記，好多我都掉咗，不過呢四疊嘢，我點都唔會掉。實習報告，專題研習，FYP同埋最後篇畢業論文…唔好話德文，你叫我用中文寫幾十版學術文體，我都要嘔心瀝血咁寫，何況係德文！
有同學嫌辛苦，用英文寫，我諗都無諗過，呢啲嘢，避得一時避唔得一世，堅持落去一定有收穫！
你依家已經可以講流利德文，成功考到C2水平，亦即是母語級水平，同時亦有開班教德文。你仲有無啲咩係想學？同埋你有無啲咩建議比我地一眾學緊德文嘅同學仔？
學海無涯！就算考完C2都好，都仲有好多嘢要學。最好嘅例子，一定係德文啲慣用語。你知唔知德文0815有咩意思？德國人講0815，唔係咩暗號，而係用嚟形容啲嘢普普通通，無咩驚喜…呢啲你未學過的話，聽到肯定會拗頭。
你問我有無咩貼士可以俾學緊德文嘅朋友？用返我自己經驗嚟講的話，千祈，千祈，千祈，好重要所以要講三次，唔好死記德文生字或者語法！好多時候，德文呢個語言背後有好多嘢可以理解，成個結構，啲字點嚟，點學，好多嘢都有答案！如果啲人同你講：『Das ist Deutsch！』『德文係咁㗎啦！』『點解小明叫小明呀！』唔好理佢，你地花多啲心機時間，都可以自己搵到答案出嚟，學下學下，你發覺你理解到嘅嘢越嚟越多，慢慢對個語言有返少少宏觀嘅感覺，講嘢嘅時候，就會覺得順暢啲，舒服啲。
仲有，唔好怕錯呀！錯係學習入面一個好正常嘅過程，我成日同我啲學生講，練習做錯呀？好嘢！開心都嚟唔切。如果你依家做練習錯咗，從錯誤中吸取經驗，咁你下次真係同德國人溝通，或者係考試嘅時候，咪唔會錯囉！
學語言，其實天份真係無大家想像中咁重要，一開始理解到個語言，之後就係睇你放幾多時間心機落去讀，肯努力，肯練習，就會學得好。都係嗰句，天道酬勤！
睇返啲練習嘅日期，我發現原來自己為咗準備考C2，考試前兩年已經開始準備。學德文，其實好容易，不過都好難。此話何解？我準備考試嘅方法，只不過係每一日做少少讀寫聽說嘅練習，個個都做到，難就係難在，你有無每一日都堅持到咁解？
延伸閱讀：
此專訪出自石賈墨及香港歌德學院合作推出的「在德港人專訪系列」，文字版權屬香港歌德學院所有。此轉載幸獲香港歌德學院授權，原文出自於歌德學院網站：https://bit.ly/3tSfUyi
Dieses Interview stammt aus der Zusammenarbeit zwischen "www.stegermatt.de" und "Goethe-Institut Hongkong". Goethe-Institut Hongkong besitzt das Urheberrecht des Textes. Die Wiedergabe hier auf der Webseite wurde von Goethe-Institut autorisiert. Das originale Interview auf der Webseite des Goethe-Instituts: https://bit.ly/3tSfUyi
想知多啲有關課程嘅資料？即刻Click入嚟呢到睇下啦！
歡迎隨時聯絡我了解更多
WhatsApp: +4917695274920
Signal: +4917695274920
Telegram: @Stegermatt
Write a comment