· 

【德國生活分享】今日係耶穌升天節 

 

星期四放假的話,好多香港人都會星期五放一日年假,做到連續放四日假嘅效果,可以去個旅行,德國人都鐘意咁做,呢啲星期二同星期四夾住嘅日子,叫Brückentag,好多公司直頭唔辦公。我本來就唔打算放假嘅,依家起緊屋,遲下裝修,搬屋,買傢俬,肯定會用好多時間,所以如果可以慳返啲假,我依家都盡量慳。不過,消防局嗰邊安排咗一個培訓,有煙帽隊資格嘅人,都要學埋點樣上雲梯救人,反正都係有薪假,何樂而不為呢。 

 

 

本來打算聽日培訓,今日放假,可以用嚟做下自己嘢點知天光無耐,窗外突然傳出極大嘅雷響!落雨嘅雨點打落窗台嘅聲音係我從來未感受過,比起冰雹更加強勁喺我半睡半醒嘅時候,傳呼機響起,係我自己仲未見過嘅警報上面寫係Wasser im Keller,牙都未擦,九秒九就衝返去先。 

 

原來,德國今年第一場大雨,太過突然,啲去水道仲有好多砂石落葉,去得唔太順,結果有個地區差不多家家戶戶都水浸。我自己無出過『抽水』車,所以都要睇睇點做係唔似火燭或者交通意外,你知道起碼無人會受傷,所以全部人其實都好輕鬆。 

 

消防車上面嘅泵,你無咩可能買到,吸力真係好強勁,浸到上小腿嘅水,十幾分鐘就抽得七七八八,所以我都係企喺隔離,負責開關,監察『抽水』過程。其實對於好多人嚟講,『抽水』真係苦差,你救人救火就話義不容辭啫,叫你做清潔咁嘅工,你真係未必肯。有無錢收?有!Aufwandentschädigung,條數要屋主埋,人頭一個鐘十歐元正。抽一次水,計落都要三幾千蚊。比著你,做唔做?計時薪,肯定唔會想做。但係今次『抽水』,我係第一次感受到自己係外國人身份都好,入到消防,人地都可以好接納你。 

 

屋企水浸,真係好麻煩,水一入屋,你根本就無辦法阻止呢悲劇繼續發生,真係唯有叫消防。我地Team人,救咗兩個地牢,每次泵完水,啲屋主都會當你神咁拜,捉住你膊頭講Vielen Dank。有個女人唔知料,仲想塞啲錢俾我我睇真啲,唔係中國人嚟咖喎哈哈,全部人同佢講:消防員唔收得咖唯有再三感謝我地幫手。 

 

No photo description available. 

 

 

返到消防局,仲要清潔,換水喉。 

中午返到屋企,好攰,不過都值得嘅。 

 

 

延伸閱讀:  

德國生活分享】德國的烈火雄心 (一)  

德國生活分享】烈火雄心幼兒班畢業 

【石賈墨】歌德學院專訪系列#1:萬事起頭難 

  

  

此為石賈墨之原創文章,轉載前請事先徵求授權並註明出處 www.stegermatt.de  

  

  

想緊貼我嘅最新動態?即刻Follow我嘅FacebookInstagram  

想知多啲有關課程嘅資料?即刻Click入嚟呢到睇下啦  

  

歡迎隨時聯絡我了解更多  

WhatsApp:  +4917695274920  

Signal: +4917695274920  

Telegram: @Stegermatt  

 

Write a comment

Comments: 0