· 

【德國生活貼士】香港人喺德國揸車,有咩嘢要留意?

 

 

 

近來有好多香港人通過Working Holiday嚟到德國,有啲人就純粹因爲嚟呢邊旅行或者留學,所以要考慮一下用咩交通工具。自駕當然係一個可行嘅選擇。 

依家小弟想喺呢度分享一下自己喺德國揸車嘅經驗,希望可以幫到想嚟德國自駕遊嘅香港人啦! 

 

前提當然要有車牌,即係香港1號車輛,自動波牌?無嘢好講。P牌係唔接受的。 

私家車牌對應德國乙類車輛Klasse B,反而無分貨Van定私家車,我考咗私家車,客貨車係可以揸的。大家嚟德國旅行,又點會揸貨Van呢?當然唔會,不過德國有WohnwagenWohnmobil,簡單啲嚟講就係露營車,大到可以喺入面訓教,你有香港私家車車牌,喺可以揸呢啲比貨Van還要大嘅露營車。當然你駕駛能力夠唔夠,就要自己衡量啦。 

 

 

 

 

電單車的話係屬於甲類車輛Klasse A。我因爲無經驗,所以唔係太清楚,估計香港嘅電單車牌,都可以喺德國度直接用。 

其實國際牌不過係類似一張翻譯文件,德國連呢張文件都無需要,所以你如果淨係喺德國揸車的話,呢八十蚊可以慳返。當然,如果你想去其他歐洲國家的話,係需要呢張國際牌嘅,咩都唔洗做,俾幾十蚊,買個保險,點都有著數。 

 

用外地牌照,可以響德國揸半年車,如果嚟旅行的話,點都夠啦。 

依家你有車牌,可以揸啦,你就要問自己幾個問題: 

 

 

你係真係需要,或者想自駕? 

 

自駕其實唔一定平,係下你想去嘅地方係咩地方。 

德國有火車,新冒起嘅長途巴士,城市裏面有地鐵,電車,巴士。根據自己需要嚟決定用咩交通工具啦!如果你係穿越幾個大城市,可能火車加本地交通會更加平,更加方便。但如果你去啲比較偏遠嘅地方,當地交通又唔發達的話,自駕就可能係最好嘅選擇。 

 

 
架車點嚟? 

 

租。好多公司,好多選擇,大公司有幾間, Sixt,Europcar 

依家租車公司提供好大彈性,比如話法蘭克福攞車,去到維也納放車都可以,甚至可以叫人嚟收。 

自己無租過,所以俾唔到好多意見大家,但我估計上網有足夠資料,大家可以自己下。 

 

 

路牌 

 

 

 

高速公路,重型車輛公路 

見到呢兩個牌,就知道呢段路無時速限制。 

 

 

出口 

 

 

 

德文字係代表出口,通常你揸揸下高速公路,會先見到説明路綫嘅大型指示牌,之後就係呢塊出口牌。 

 

 

單向行車綫 

 

 

 

德文字代表單向行車綫,你入咗去,就要揸到篤。 

 

 

限制取消 

 

 

 

呢塊係最爽皮嘅指示牌,雖然Adidas的確係德國公司,但唔關Adidas事,呢塊牌有四條綫,代表之前嘅限制依家一筆勾銷假設你響高速公路上面見到有個地盤,叫你揸120,到你過咗個地盤,通常你會見到呢塊牌,代表呢個120嘅限制已經取消。 

 

 

,此處先行 

 

 

 

德國有呢塊牌,同香港嘅一樣,祇不過係無咗個勁多筆劃嘅讓字。另一方面德國有"此處先行"其實就係嘅相反意思。你見到呢塊牌,可以安心揸過呢個街口,其他分支會有讓牌。呢類似火箭嘅牌係多一重保障,等揸緊先行權道路嘅司機更加清楚咁解 

 

 

先行路 

 

 

 

其實就係此處先行嘅延長版,你見到呢塊牌之後,就可以記住,呢條街係先行路,你大曬,知道你見到之類嘅牌,就知道你再無先行權。 

 

 

城區,非城區 

 

  

 

 

睇唔明塊牌上面寫,好正常,不過你唔需要知,地名嚟咖啫,最重要係你認得個形狀。前者代表你進入咗城區,速度如果無額外注明係50,下面塊牌代表你離開緊一個城區,可以揸100,但係喺三公里内你會進入另一個城區,到時你又會見到一塊城區牌。 

 

 

三十區 

 

 

 

你可能會問,一個圈加三十,即係揸30囉,點解又要加個Zone落去。其實你有道理,三十區自然揸三十,但係響呢個區裏面,唔一定會有牌指示你要讓定先行,咁你就要不斷使用右先於左呢個原則,每過一個街口你都要減慢,睇下右邊有無車嚟,無你就可以繼續,有的話你要讓佢。你嘅左邊就可以完全無視啦。點解?因爲你嘅左邊就係佢嘅右邊(複雜呢),佢要讓你的。 

 

 

低交通區 

 

 

 

呢塊牌其實咩意思都好清楚,德國人俗稱叫"Spielstraße",即係"玩樂區街道",你揸咗入去唔係代表你會好開心,而係呢條街係屬於民居地區,細路仔可以響上面玩,所以必須極小心揸車,官方規定係車速要等於步行速度。 

 

 

備注 

 

 

 

有時候有啲牌下面有備注,例如話高速公路無端端寫80,下面有塊牌寫咗啲嘢,你睇唔明,呢個時候你就要觀察下其他車,有無真係話完全無視呢塊牌。下面可能寫:限雨天。平常天氣的話你就唔需要理會 

 

 

交通規則 

 

再總括一下: 

 

右上左落 

因爲車係左軚車,所以廢話都要講多次,車係靠右行的。所以記得:轉彎嘅時候唔好習慣性食住左邊彎嚟入,記得盡量靠右。入迴旋處嘅時候,亦都係向右行,唔好轉錯。講起迴旋處,記得出彎嘅時候要打燈,等想入迴旋處嘅人知道你係咪出緊去。 

 

左讓右 

上面提及,有個原則叫先右後左,或者叫左讓右啦。但凡見到完全無表示嘅路口,三十區入面,都要讓右面嘅車。 

 

速度 

普通城區:50 km/h 
30區:30km/h (廢話),但記得街口前要非常慢,睇實右邊有無車嚟。 

低交通: 步行速度,即不多於7km/h,實際上甚少人遵守,絕對唔好快30。我自己通常二波三波唔油就十幾二十慢慢 

郊區:100km/h,有時候郊區有啲路上上落落,彎都幾急下,唔好以爲你話一百就用到盡。除非你好似德國人揸得慣,又清楚自己架車屬於咩水平,否則佢寫一百,有啲路你都唔好揸到盡。 

重型車輛用馬路:無限制,建議130km/h 

高速公路:無限制,建議130km/h,不建議低於80km/h 

 

爬頭 

首先呢大家有揸車都知道,如非必要唔好爬人頭,因爲你爬頭就係短暫嘅逆綫行車,好危險。不過喺德國有時候你唔能夠唔爬頭,例子:呢邊好多人踩單車,亦有好多拖拉機,地速度不過二十三十,響非城區你係唔爬唔得。呢時候你就要及早留意,對面有無車,有的話你真係要早早刹車,跟住拖拉機尾,到真係完全睇到嚟緊幾百米真係無快車,就可以拖返落低波,極速爬頭。 

 

泊車牌 

 

 

 

一方面可以當冰刮用,另一方面嘅真正用途係指示你嘅停車時間,比如話某啲地方可以泊車,但祇限半個鐘,咁你就唔會搵到好似香港咁一碌一碌嘅泊車錶,而係要將你停車時間轉上去,放響車頭玻璃下容易可見嘅地方,張圖就係代表你十一點泊咗嚟,咁十一點半,如果有警察叔叔嚟巡,見到你塊牌,就知道你超時半個鐘,比張牛肉乾你。 

 

 

更深入地講解下某啲題目 

 

高速公路 

德國真係好出名,差不多同啤酒香腸齊名嘅特色,可以話係所謂的"歐韜班"Autobahn高速公路,響德國高速公路上面係無速度限制的(有啲路段容易塞,或者有工程搞緊,會限制返個速度)。呢樣嘢聽落好不可思議,但新手揸上去,如果撞正車多,係好容易嚇到標尿的。 

 

通常德國嘅高速公路最少有三條線,無論佢係兩條線定係三條線都好,最左邊條線一定係快綫,而右邊的線就一定係慢線。通常啲大貨櫃車或者比較慢既車都會靠右行,咁比喻你時速80,就唔需要爬頭,一路行右綫就得啦。你跟住客貨車便可。如果你要爬頭,咁你就可以係中線行車,如果都係遇到啲太慢嘅車,你就可以再用埋左綫爬頭。記得記得:左邊其實大家用嚟爬頭。如果有空位,記得盡量靠右行,否則會人鬧。 

 

轉綫唔係你話想點轉就點轉,響高速公路上面,你永遠祇呢夠用快綫,從人家左邊爬頭。圖:依家你係一號車,揸得好快,行中綫,要爬二號車頭,你要睇快綫有無車嚟緊,有的話你要收油,跟二號車尾,等人家過咗,你就打左燈,上快綫,過完就打右燈返返去中綫。你係唔可以用慢綫超車的!快車永遠都有先行權。所以如果你係三號車,想爬四號車頭,你應該比一號車行先。 

 

 

 
可能有啲男人,難得嚟到德國,上歐韜班,就想扮拓海,踩衡油門。呢我都明白,有時候我出差要晨早出門,馬路上面車都唔見一架,又揸緊公司車,就會測試一下架車嘅極限。不過都係偶爲之,平時自己係揸140或者160視乎自己急唔急啦。揸超過130係好浪費油,又要打醒十二分精神,所以最好都係唔好貪快。 

 
如果你想扮一下拓海,首先你要問下自己得唔得。響高速公路上面你要成日爬頭,好需要你睇左鏡,倒後鏡,去判斷其他車嘅位置同速度,而且你要記得轉頭,唔洗好似考試咁誇張,但響高速公路上面,真係好重要。 

 

除非你租法拉利,林寶之類嘅車,你好肯定無咩人快得過你的話,唔好以爲你就可以毫無忌憚轉左綫,因爲你就算你揸緊架寶馬,俾行曬油,行緊270,前面架福士揸緊190,你覺得佢實在太慢,要爬佢頭的話,你永遠都唔知左綫有無一間法拉利剛剛從後用時速320飛撲而來,轉頭向左就係要睇倒後鏡同左鏡都睇唔到嘅死角。 

 
重申一次,快綫嘅車係有先行權的,你要轉綫的話,必須要注意,唔好阻住啲有錢佬風馳電掣,佢刹唔切車,先唔講一架時速三百嘅車從後炒落你車尾,你有幾多機會可以生存,比你生存到,都可能唔想生存,因爲出事係你嘅責任,所有人,車嘅損傷都要你賠。我唔想恐嚇各位上歐韜班嘅朋友,但係香港的確無路段係可以咁快咁危險。所以婆媽都要講:一開始慢慢嚟,習慣咗再可以體驗下速度。 

 

 

 

另外清楚車入面近車門度,應該有張Label,講到明如果係冬天軚的話,都有一個時速限制,通常係190左右,咁你就唔好試,冬天軚係多軚紋,等水啊雪啊泥啊呢啲半液體可以排出去,但平常計的話係無咁咬地的。 

 

 

其他德國有,香港無嘅規則 

 

天氣 

香港凍極都唔會落雪(就算都係大霧山山頂掛)而德國冬天落雪係好平常的,就算唔係冬天,春天秋天入黑之後,氣溫都可以跌穿零度。當然響德國如果你租車,唔需要擔心架車嘅規格,比如話車胎或者擋風玻璃水,佢地會適時換胎(一年兩次,冬夏各一次,溫度低過六度就會換),玻璃水亦都撈埋酒精,唔會因爲低溫而結冰。 

 

如果咁唔好彩,天氣差,落雪的話,第一件事就係要搵下車入面有無個冰刮,刮走所有雪,包括車頂上面嘅冰同雪(你刹車急的話啲雪會滑落去車頭玻璃度)。另一方面你要及早車,開行車窗發熱器,等車入面啲水汽唔會癡響車入面嘅玻璃。 

 

 

 

刮好冰雪,嘢清清楚楚,唔代表你可以放心揸,因爲你架車有雪的話,代表路面可能有積雪,或者半融化嘅雪水,就算你睇落好似無雪無剩,淨係見到一陣薄薄嘅白色霧氣鋪喺馬路上面,其實反而係最危險,因爲咁可以代表路面結咗冰,會好滑。唔好話:超,你又話有冬天軚。冬天會有幫助,但係如果路面有明顯積雪,或者結冰的話,啲軚都係廢的。你一定要比平時揸嘅速度慢一半以上,早一倍,甚至兩倍距離就刹車,入彎尤甚。有新雪的話,無論刹車定轉彎,都極度難操控!無經驗的話,真係寧願唔好揸! 

 

去其他國家 

揸德國高速公路唔駛畀錢,但揸去其他歐洲國家,可能要買通行證,或者上高速的時候要比錢。瑞士就斷年計,一年大概四十唔理你嚟一日定一個月,買張貼紙,瑞士任通行。法國就響某路段入口出口擺收費站,類似香港啲隧道咁。出發之前記得定資料。 

 

 

 

由於德國的交通規則實在太多,不能盡錄。所以大家有問題的話,歡迎留言,我會盡量解答大家既問題。 

 

 

延伸閱讀:  

  

  

此為石賈墨之原創文章,轉載前請事先徵求授權並註明出處 www.stegermatt.de  

  

  

想緊貼我嘅最新動態?即刻Follow我嘅FacebookInstagram  

想知多啲有關課程嘅資料?即刻Click入嚟呢到睇下啦  

  

歡迎隨時聯絡我了解更多  

WhatsApp:  +4917695274920  

Signal: +4917695274920  

Telegram: @Stegermatt  

   

  

Write a comment

Comments: 0