· 

【德國工作點滴】牛油果狂魔

其實我真正身份唔係一個德文補習老師…而係一個工程師。德文補習不過係我嘅一份兼職,做消防員,亦都祇係興趣,理論上我係應該講多啲我做工程師嘅故仔俾大家聽下嘅。 

 

 

 

話説我返工嘅公司,專係負責設計同生產用嚟處理生果蔬菜嘅機器…唔係你想買嗰啲咩聰明料理機呀!雖然德國Vorwerk出嘅Thermomix真係好出名,但係我地整嘅係工業用嘅大型機器,就算買得起,屋企都一定放唔落。 

搵到呢份工,本來都係撞彩呢度背後有段古,不過呢係後話啦…舊年我老細無端端走嚟同我講,有個客想處理牛油果,每日斷噸計,成幾千個!依家竟然仲係用人手處理,一個一個...真係好瘋狂。 

 

"Hast du eine Idee?" 我咪話睇下囉。我快快手用咗一兩日砌咗部Prototype出嚟,我老細見到有嘢好似行得走得喎,開心到暈,即刻搵個客嚟傾。一搞,呢Project就搞咗成年。 

依家,終於有第一階段嘅成果——雖然都係要人手處理,不過成個流程改善咗,而設計出嚟嘅工具,令到挖出嚟嘅牛油果表面靚咗,少咗果肉浪費,而且啲工人唔需要再用力轉手腕,大大減低佢地嘅手腕勞損嘅機會。我去咗英國兩次,落到個site嗰度,見到啲工人用部Prototype用得好開心,其實都幾有成功感。 

 

搞呢Project都好多嘢好好笑,搵一單同大家分享下: 

設計得機器都好,一定要用Product嚟試,呢個好易理解,但係因爲我地玩開嘅係生果蔬菜,屬於自然產品,好難跟個Spec設計完之後就一天都光曬,一定要揀啱嘅品種嚟試,而且一定要試得夠多,先可以下定論。所以我revisePrototype嘅時候,每日都要用上一大堆嘅牛油果。你可以同批發商訂,不過無得自己揀。大細,成熟度,形狀,表皮狀態,統統都要考慮。 

所以最好都係去附近嘅超級市場買。 

 

第一次,我走入去,見到牛油果,就揀咗兩箱。 

去到收銀機度,銀員呆咗。望下我,再望下嗰幾十個大大小小嘅牛油果,相信佢心諗:你咩料呀,要買多個牛油果?亞洲道士煉藥?成個表情充滿疑惑。即刻同個同事用Walkie對話,我以爲佢見得多中國人掃奶粉,以爲我想掃走曬全部牛油果,想同經理講,出『限牛令』,搞到我都心慌慌。 

原來佢係叫同事去數下有幾多個牛油果淨。我買得兩箱,其實都差不多買就叫個同事入定貨。 

 

搞咗一大輪,佢都係要做我生意咖啦,就開始數有幾多個。 

"Wenn Sie mir glauben: 35 Stück sind sie."揀完梗係自己數過,無謂要人數多次。又真係信我喎,直接就埋單。 

如是者,每一次我做測試,都要去超級市場受盡『歧視』…我相信嗰段時間附近嘅超級市場嘅收銀員都知道我呢個『牛油果狂魔』嘅存在。我知道嗰日要試部Prototype的話,一定會著公司衫出門口,上面大大隻字寫咗"Nahrungsmitteltechnik",講到明係食品科技,就知道我買啲牛油果返去,唔係用嚟自己食,而係用嚟試機,節省我唔少口水。 

 

No photo description available. 

 

 

唔知你地又有無試過喺德國超級市場遇到啲咩趣事呢? 

 

 

延伸閱讀:  

德國工作點滴】家鄉,係咩氣味?  

德國工作點滴】不是最後一課的最後一課 

【石賈墨】歌德學院專訪系列#1:萬事起頭難 

  

  

此為石賈墨之原創文章,轉載前請事先徵求授權並註明出處 www.stegermatt.de  

  

  

想緊貼我嘅最新動態?即刻Follow我嘅FacebookInstagram  

想知多啲有關課程嘅資料?即刻Click入嚟呢到睇下啦  

  

歡迎隨時聯絡我了解更多  

WhatsApp:  +4917695274920  

Signal: +4917695274920  

Telegram: @Stegermatt  

 

 

 

 

 

Write a comment

Comments: 0