· 

【德文學習】點樣用Yabla網站,睇片學德文? 

 

 

https://image.jimcdn.com/app/cms/image/transf/dimension=831x10000:format=png/path/sa6cfc39a5f4c4125/image/ia3f2a9fa861ce1cb/version/1587034505/image.png 

留喺屋企學德文 

 

武漢肺炎,肆虐全球,依家人都要儘可能留返喺屋企,生活模式真係唔同曬。就算想學德文都好,依家歌德都暫停全部課堂,改用網上教學嘅模式嚟上堂,有時候真係覺得未必好夠喉。所以而家好多學生都問我點樣可以足不出戶,盡用網上資源嚟幫自己繼續學德文。 

 

我其實喺幾年前已經開始用網上補習社嘅形式嚟幫學生學德文,今次疫情,對於我嘅教學模式,影響其實係接近零…如果要人在德國,都可以教到香港嘅學生,你諗下,唔用遙距教學的話,邊有可能。 

 

我嘅課堂,一個禮拜上個半鐘,時間始終都有限,我自己上堂真係希望多啲「教書」,如果係做練習的話,好需要啲學生自己抽時間嚟做練習。作爲曾經都係初哥嘅德文學習者,如果講話咩學德文嘅心得,有一樣嘢我係好憎聽到嘅:好多學過德文嘅人,會話咩多聽多講多睇多寫喎… 

 

嘩,果然係大師,我真係唔知畀咩反應好。 

 

 

足不出戶,片「浸」德文 

 

授之以魚不如授之以漁,呢一個係我幫學生學德文一個好重要嘅理念,所以我覺得我有需要同學生講一講,我有啲地道嘅德文,到底喺邊度學返嚟,教佢地自己學,更加有效率。你肯定會講,你住咗喺德國十年,老婆又係德國人,你自然學到地道德文啦!係,但係除咗我喺德國嘅生活經驗之外,都有可能可以學到地道嘅德文嘅。 

 

有研究比較過唔同嘅學習方法,如果想學好一樣嘢,通過閱讀,效益係最差,聆聽比較好,用視覺的話,又會更上一層樓——如果將「聽」同「睇」結合一齊嚟做,會有協同效應,效果會更加理想。如果你有聽過甚至用過「Immersive reader」的話,你會明白個道理喺邊。當然,有機會可以主動「講」的話,學習效益會比以上所有方式都更加好…不過要有能力進行「創作」嘅過程,都一定要有咁上下嘅「材料」先可以,所以我先講「接受資訊」嘅學習方法先。 

 

啲人成日話學語言要「浸」,除咗嚟德國學有「浸」嘅效果之外,其實都可以退而求其次,尋找一個最高效能嘅「Immersion」效果。片,又有「聽」嘅元素,又有「睇」嘅元素,如果加埋字幕,就有埋「閱讀」嘅成份,可以話係同德國人對話以外,最大嘅Immersion,可以做到所謂「浸」嘅效果。講到片的話,方便又免費,YouTube或者係開Netflix德文劇就已經得。不過用呢兩個渠道嚟睇片學德文,稱唔上係最好嘅方式。 

 

無錯,YouTube的確有非常之多質素高嘅內容,而且又係免費,淨係講啲學德文嘅Channel,已經多如恆河沙數,但係始終真係要用嚟「輔助吸收」,個界面真係唔係好就手…YouTube始終都係一個主打娛樂嘅平臺。而Netflix德文劇,對話可能對於某啲初學者嚟講,實在太深,有德文字幕都未必跟到,所以只限德文有返咁上下水平嘅人用煲劇嘅方式嚟進修。 

 

所以我想介紹一個我自己喺以前學德文期間都有用過嘅網站。 

 

Yabla - 「語言學習版」YouTube 

網站叫Yabla 

 

https://image.jimcdn.com/app/cms/image/transf/dimension=831x10000:format=png/path/sa6cfc39a5f4c4125/image/i2fba18b03a76a7c3/version/1587035406/image.png 

 

 

「唔離地」德文影片庫 

 

Yabla網站,有好多種語言可以你揀,德文只係其中一個。簡單啲嚟講,呢個網站其實就係一個有好多德文片俾你睇嘅網站…不過,要睇片的話,係要課金的。 

 

片!我不如YouTube算數 

人家收得你錢,其實係有原因的,我自己課過金,當然係覺得值先會課同推薦其他人用啦。 

 

首先,呢網站,強調啲片authentic,翻譯成爲廣東話,應該係講「唔離地」。網站入面有成千上萬條片,從卡通,訪問,短劇,煮食,新聞,科普,教學,甚至到兒童不宜嘅內容都好(例如有啲粗口歌MV),包羅萬有,而且全部都分好類別,亦都會有難度分級,唔單止方便你搵自己想睇嘅嘢,更加可以搵到難度上適合你嘅片。 

 

雖然有分類,係幾方便,但我覺得呢都唔係值錢嘅地方。值錢嘅地方係佢有一個自己嘅Player,等我介紹返。 

 

首先,大家可以睇睇Yabla免費你試嘅片。等我介紹一下YablaPlayer有功能啦。 

 

https://image.jimcdn.com/app/cms/image/transf/dimension=831x10000:format=png/path/sa6cfc39a5f4c4125/image/i64da684b316b76c4/version/1587034505/image.png 

 

1. 你見到,每一段片都有字幕,而且係德英字幕,一早幫你翻譯定!如果想知道一個字比較深入嘅翻譯,可以Click落去,右邊嘅字典,會有詳細嘅資料。我覺得呢雙語字幕,係Yabla值錢嘅核心。有字幕,學起上嚟真係快好多,而你亦都唔需要話怕唔明,因爲有英文解釋幫你(儘量唔好睇英文先,甚至可以熄咗佢,逼自己睇德文字幕先)。 

 

2. 有一個「減速」模式,如果你覺得段片入面嘅對話太快,你可以Click落隻龜度,佢可以將速度下降到75%或者50%,而個Player會自動調節返把聲嘅音調的!雖然仍然會有少少唔自然,但係對於掌握發音,跟讀真係有好大幫助。我當時都有成日用呢功能,主要係當影片入面嘅人講啲長句子嘅時候,入面有啲短嘅字,感覺會「飛咗」,用慢速聽,就可以確定返佢讀法係如何。 

 

3. 如果連減速都幫你唔到,你仲可以用「狂Loop」模式,Click落去個「旋轉」Icon度,嗰句句子就會不停Loop,Loop到你覺得自己聽得清楚,讀得清楚爲止。 

 

4. 你見到右下角,有一個Games嘅制唔好咁大期望,所謂嘅Game,都唔係話好好玩…Multiple Choice啲選擇我覺得實在太白癡,所以唔建議你做,不過Fill in the black係會幫到你串字的。真係最好玩係攞咗專利嘅Dictation,佢會播返啲句子俾你聽,然後要你默返出嚟。老實講,細個默書,真係好大壓力,真係幾十年無默過,用呢方式嚟默,其實都叫幾好玩。而且默書真係幫到你Listening同Writing好多,兩者係可以同時練。呢個默書模式我都誠意推薦。 

 

https://image.jimcdn.com/app/cms/image/transf/dimension=831x10000:format=png/path/sa6cfc39a5f4c4125/image/ie19ee91303ec8f67/version/1587034505/image.png 

 

好啦,我介紹完,你都大概知道Yabla網站係點樣幫你學德文的。 

最後,我中立分析一下啲優點同缺點俾你地參考下。 

 

優點 

  • Yabla啲片全部都取自現實生活入面會遇到嘅形式,好多片入面講嘢嘅人,都係用最生活化嘅方式嚟講,可以幫到大家學地道嘅德文。 

  • 有片,有聲聽,又有德文字幕,加埋英文翻譯,老實講,嘅時候真係好有「完滿」嘅感覺,我唔知道可以用咩形容詞嚟描述呢種感覺,總之就係爽。 

  • 簡單嘅字,用Yabla player學,好快就可以初步學曉 

  • 片,好過你書做練習啦係呀,睇落係會有興趣繼續落去的。 

  • 默書模式,值得推薦,可以確實快速提升聆聽同寫作能力。 

 

缺點 

  • 可惜嘅係字幕啲翻譯,用嘅字典,質素唔係好好。如果要學得好啲,都係要另外自己再查。不過我自己覺得Yabla係強調Immersion,所以如果真係認真學,都係要查字典,所以都唔係一個重大缺憾。 

  • 有時候有啲片雖然無話兒童不宜,但係入面有啲好粗鄙嘅用字,唔可以個個場合都講,所以有可能會學壞… 

  • 如果有埋其他學習配套,例如話提供例句,或者啲語法上嘅分析,我諗就真係完美啦… 

 

雖然話係有缺點啫,但係我自己覺得都值嘅,如果想睇片學德文的話,不妨考慮一下。 

 

備註:呢一篇文,係包含咗我同Yabla網站之間嘅Affiliate programm,如果你用呢度嘅Link申請Yabla服務,我係會有Return的。 

 

 

延伸閱讀:  

  

  

此為石賈墨之原創文章,轉載前請事先徵求授權並註明出處 www.stegermatt.de  

  

  

想緊貼我嘅最新動態?即刻Follow我嘅FacebookInstagram  

想知多啲有關課程嘅資料?即刻Click入嚟睇下  

  

歡迎隨時聯絡我了解更多  

WhatsApp:  +4917695274920  

Signal: +4917695274920  

Telegram: @Stegermatt  

 

 

Write a comment

Comments: 0