留喺屋企學德文
武漢肺炎，肆虐全球，依家人人都要儘可能留返喺屋企，生活模式真係唔同曬。就算想學德文都好，依家歌德都暫停曬全部課堂，改用網上教學嘅模式嚟上堂，有時候真係覺得未必好夠喉。所以而家好多學生都問我點樣可以足不出戶，盡用網上資源嚟幫自己繼續學德文。
我其實喺幾年前已經開始用網上補習社嘅形式嚟幫學生學德文，今次疫情，對於我嘅教學模式，影響其實係接近零…如果要人在德國，都可以教到香港嘅學生，你諗下，唔用遙距教學的話，邊有可能。
我嘅課堂，一個禮拜上個半鐘，時間始終都有限，我自己上堂真係希望多啲「教書」，如果係做練習的話，好需要啲學生自己抽時間嚟做練習。作爲曾經都係初哥嘅德文學習者，如果講話咩學德文嘅心得，有一樣嘢我係好憎聽到嘅：好多學過德文嘅人，會話咩多聽多講多睇多寫喎…
嘩，果然係大師，我真係唔知畀咩反應佢好。
足不出戶，睇片「浸」德文
授之以魚不如授之以漁，呢一個係我幫學生學德文一個好重要嘅理念，所以我覺得我有需要同學生講一講，我有啲地道嘅德文，到底喺邊度學返嚟，教佢地自己學，更加有效率。咁你肯定會講，你住咗喺德國十年，老婆又係德國人，你自然學到地道德文啦！係，但係除咗我喺德國嘅生活經驗之外，都有可能可以學到地道嘅德文嘅。
有研究比較過唔同嘅學習方法，如果想學好一樣嘢，通過閱讀，效益係最差，聆聽比較好，用視覺的話，又會更上一層樓——如果將「聽」同「睇」結合一齊嚟做，會有協同效應，效果會更加理想。如果你有聽過甚至用過「Immersive reader」的話，你會明白個道理喺邊。當然，有機會可以主動「講」的話，學習效益會比以上所有方式都更加好…不過要有能力進行「創作」嘅過程，都一定要有咁上下嘅「材料」先可以，所以我先講「接受資訊」嘅學習方法先。
啲人成日話學語言要「浸」，除咗嚟德國學有「浸」嘅效果之外，其實都可以退而求其次，尋找一個最高效能嘅「Immersion」效果。睇片，又有「聽」嘅元素，又有「睇」嘅元素，如果加埋字幕，就有埋「閱讀」嘅成份，可以話係同德國人對話以外，最大嘅Immersion，可以做到所謂「浸」嘅效果。講到睇片的話，方便又免費，睇YouTube或者係開Netflix睇德文劇就已經得。不過用呢兩個渠道嚟睇片學德文，稱唔上係最好嘅方式。
無錯，YouTube的確有非常之多質素高嘅內容，而且又係免費，淨係講啲學德文嘅Channel，已經多如恆河沙數，但係始終真係要用嚟「輔助吸收」，個界面真係唔係好就手…YouTube始終都係一個主打娛樂嘅平臺。而Netflix睇德文劇，對話可能對於某啲初學者嚟講，實在太深，有德文字幕都未必跟到，所以只限德文有返咁上下水平嘅人用煲劇嘅方式嚟進修。
所以我想介紹一個我自己喺以前學德文期間都有用過嘅網站。
Yabla - 「語言學習版」YouTube
呢個網站叫Yabla。
「唔離地」德文影片庫
Yabla呢個網站，有好多種語言可以俾你揀，德文只係其中一個。簡單啲嚟講，呢個網站其實就係一個有好多德文片俾你睇嘅網站…不過，要睇片的話，係要課金的。
俾錢睇片！咁我不如睇YouTube算數！
人家收得你錢，其實係有原因的，我自己課過金，當然係覺得值先會課同推薦畀其他人用啦。
首先，呢個網站，強調啲片authentic，翻譯成爲廣東話，應該係講「唔離地」。網站入面有成千上萬條片，從卡通，訪問，短劇，煮食，新聞，科普，教學，甚至到兒童不宜嘅內容都好（例如有啲粗口歌MV），包羅萬有，而且全部都分好類別，亦都會有難度分級，唔單止方便你搵自己想睇嘅嘢，更加可以搵到難度上適合你嘅片。
雖然有分類，係幾方便，但我覺得呢個都唔係佢值錢嘅地方。佢值錢嘅地方係佢有一個自己嘅Player，等我介紹返。
首先，大家可以睇睇Yabla免費俾你試睇嘅片。等我介紹一下Yabla呢個Player有咩功能啦。