【時代革命】衡量用赤納粹比喻時的考量 - 精讀版

前言

網上討論，其實已經好足夠，我唔打算繼續回應，不過見到好多人都話篇文太長，要求精讀版，用作傳播之用，呢個我可以做多一次。喺度，我先張貼返自己寫過嘅嘢嘅傳送門，同埋其他人嘅回應：

【時代革命】請立刻停止使用「赤納粹」比喻

【時代革命】回應返我呼籲停用「赤納粹」比喻所引起嘅疑問

如果大家有睇開我之前寫嘅嘢，其實我自己本身寫嘢，係粗口都無咩點寫的。上一次回應嘅時候，加入大量粗俗嘅比喻，甚至『花式摟屌』（套用盧兄回應講法），以謾罵嘅形式，針對之前批評者嘅言論，純粹係希望大家可以用最直接嘅方法，理解我嘅論點。如果當中有人覺得我呢個講法，係割席嘅行為，或者分化咗大家嘅戰意，係我玩膠玩過龍，喺度我絕對可以同大家道歉。

我好清楚覺得唔接受我觀點嘅朋友，極大部分都係同道中人，如果你地可以提出一啲有關赤納粹比較，喺德國可以走到咩教育路線嘅討論，我絕對歡迎。好希望大家可以繼續努力。

關於我：

小弟石賈墨，嚟咗德國就十年，德文C2，有教德文，所以一開始有人聯絡我，想我幫手登報，我就做咗報館聯絡人，用埋自己個名做ViSdP（類似刊物內容法律負責人啦），三次登報計劃，都有參與。我講呢個背景，唔係好似盧兄咁講係『社運Profile』，一嚟我係一個普通工程師，並非社運人士，何來Profile；二嚟我想話俾大家聽我嘅立場…就咁睇標題，好多人覺得我維穩，就唔睇落去…。

我自己依家最重要嘅目標係：用盡所有方法，將香港同中共呢個議題，帶入德國媒體同政治討論入面，希望有朝一日，德國人可以明白同中共合作嘅問題，從而會改變對中政策。

因為登報關係，同呢邊傳媒人有傾開，自從瑞士報過一次『赤納粹』之後，我就收到好多德國傳媒人嘅負面評價。

赤納粹比喻

大家觀察其實十分正確：德國人係左膠，喜歡反納粹專利化，唔能夠擺脫納粹陰影。對於上一代嚟講，用納粹嚟做任何比較，都勾起佢地嘅黑暗過去。我用嘅比喻，就係你傷心，都唔會講你傷心到好似你朋友死咗老母咁。德國同其他歐洲國家，仍然有納粹生還者，我自己覺得呢個比較，可以理解。就算你話提醒極權冒起，呢個字始終都對某啲人嚟講係敏感，呢個事實，大家都清楚。

我自己認為，contextual嘅比較，絕對無問題，例如話黑警『曱甴』論，可以講，對比Gestapo同黑警嘅圖片，亦可以做，但係用『赤納粹』套落中共到，的確會引起好多德國人反感。

我呼籲大家停用赤納粹比喻，原因就係咁簡單：赤納粹呢個比較，惹德國人反感。

咁呢度就有幾個反對我嘅論點：

一。中共之邪惡，比納粹有過之而無不及，唔將中共比成納粹，就係幫佢塗脂抹粉。

中共喺新疆同西藏做咩，的確係納粹嘅行為。但係技術上嘅比較，就算精闢，都唔會幫到媒體報導同政治討論（有人話國際間鐘意呢個字，或者某啲國家唔介意，呢個有可能，我想集中講歐洲）。要比喻，可以用啲無咩爭議性嘅比喻嚟做，例如話黃之鋒講DDR，香港新柏林，呢邊嘅傳媒就好受落。

二。赤納粹係事實，唔講，就係德國人掩耳盜鈴。德國人對納粹認識有偏差，不能因此就唔講，不能只顧德國左膠感受。

惹火言論，可以講，但要睇德國受眾反應。上面有講，德國人係左膠係事實，問題係大家都話要『解釋』俾德國人聽，『教育』德國人，但無人講可以點做。就算我肯解釋，赤納粹呢個講法，根本就入唔到政治語言嘅框架…德國呢個左膠國，你有無可能可以憑幾個香港人嘅論述，動搖到成個國家嘅政治取向？你斥責德國人左膠，對論述有幫助咩？

三。我認識的德國人，好鐘意呢個比喻！好多德國人都成日講納粹，點解我地唔講得？

我唔能夠代表所有德國人，但係我認識嘅傳媒人，都對呢個字避之則吉。其他國家有無正面咁報導呢個字，我唔清楚，德國就直頭無見過。主要原因，就係納粹唔屬於德國嘅政治語言。年紀輕嘅人互相交談，網絡上用語，當然充斥納粹用字，媒體同政治討論，所用嘅語言，自然又有所不同。講納粹，風險太高。

德國本土，當然都有納粹比喻，但亦非主流。例子：扣AfD帽子，媒體會講極右主義Rechtsextremismus，但其實分類上，佢地係右翼民粹主義Rechtspopulismus。其實納粹，本質就係極右，但德國人就係覺得納粹呢個概念敏感，所以棄用。

係，我強調多次，德國人就係一班左膠。依家德國真係近乎無真正嘅右翼政黨（呢個問題唔講啦），但係針對呢個事實，你只有一個方法：望佢膠多兩錢，收多幾個黃台仰，李東昇，劉霞艾未未，擁抱佢啲左膠先，然後再慢慢咁講述中共嘅邪惡本質。有人認為我明知德國人認知偏差都咁做，唔正確。你可以咁睇，我唔要求個個德國人對納粹同世界局勢有全面認識，但係希望做到一個效果，就係講香港，講中共，佢地會慢慢有一個新嘅概念。呢個過程，非常漫長，亦要步步為營，講赤納粹，對呢個過程，毫無幫助，只會有負面影響。

呢度有人質疑，德國唔係主戰場，歐盟無用，認為英美比較重要，唔需要理會德國。但睇返中國同歐盟，德國嘅貿易量，其實德國同歐盟可以影響中國嘅潛力，可以靠得住美國。歐洲議會有通過動議，德國有好多政治人物表明支持香港民主運動，（詳細請睇完整版）當呢股勢力夠大嘅時候，德國國會就有機會可以審視中德貿易安排，但係一切都要回歸民主制度之本：德國人。

只要德國人喺香港，中國呢個議題上嘅認知，可以再強硬啲，咁可能德國都會考慮切斷資助，反收購，拒絕華為5G，甚至出Magnitsky制裁高官。目標係好遙遠的，但係正正係因為咁，我地更加要小心啲講我地嘅論述。重申：用赤納粹鬧中共，佢地唔會唔開心，但係倒咗德國呢邊米，就覆水難收。

最後，有人問，應該用咩字眼去形容中共？

攬炒巴就用『抗極權』取代『赤納粹』嚟做Rally嘅主題。我覺得佢嘅考慮一定比我周全，攬炒團隊，喺今次呢個運動嘅角色，相信無人可以質疑。我要信領導運動方向嘅人，第一個信做到實事嘅佢。

極權，法西斯，暴政，獨裁，任君選擇。你認定係要赤納粹嚟比喻，加個反字，打個大交叉，客觀嚟講會比較好。但係我自己認為，點解一定要硬取一個字嚟比較呢？你話我怕事，擁抱德國左膠也好，我寧願用其他唔敏感嘅字眼嚟做文宣，好過冒險。

我希望大家考慮一下，赤納粹呢個字，喺香港，其他國家，可以帶嚟咩正面幫助，喺德國，又會帶嚟咩負面影響。如果最後決定係正面幫助大過負面，就用吧。