【石賈墨】時間上嘅「五馬分屍」

小弟仲喺度，仍然生生猛猛，不過所有唔係最重要嘅嘢，我全部放低曬。
真係搵啲時間抽下水都難。

May be an image of 2 people

時間上嘅「五馬分屍」

好簡單，你同我一齊計下條數：一日有二十四小時，扣除咗食飯瞓覺呢啲生理需要之後，我要用餘下嘅時間返工，湊仔，起屋，補習同搞網上課程。真係好似『五馬分屍』…

逐樣逐樣講。
一路跟緊嘅牛油果機械人Project，早兩個月已經攞到德國政府資助，大拿拿幾百萬港紙，雖然得米，但亦代表頭已洗濕，啲嘢已經無得再hea住做。啱啱遇上上個月公司四十週年活動，用機械人做Demo畀啲客睇睇，依家揚咗，有四個大客之後話想要『搞搞機』，老闆話機會嚟啦飛雲，依家要我食住條水，睇睇可唔可以推到個新嘅R&D模式出嚟，仲問定我今年仲有幾多日假期，話想我依家放曬，遲下啲客拉住我嘅時候可以chur到盡喎…

湊仔就唔多需要講，有湊過都知辛苦，最惡搞係你根本計算唔到啲時間可以點安排，佢要瞓就瞓，要喊就喊，其他嘢根本就無得一口氣做到底。不過好彩德國產假夠多，我老婆攞足一年，無憂無慮喺屋企照顧小朋友，我夜晚起碼都叫有覺好瞓，但係返到屋企始終都係要take over返照顧小朋友嘅責任，煮個靚飯俾老婆食，等佢可以休息一下。

至於間屋，搞咗咁耐，終於起到七七八八，呢兩日地板已經鋪好，廚房正在安裝中，定咗十一月尾搬。起屋，搬屋，本身已經有好大量瑣碎嘅決定要做，十分之黐身。而作為一個讀Automation嘅Eng賤佬，同人講自己間屋無Automation，顏面何存！一早已經計劃好要點樣搞，不過買料，裝，寫Programm都要自己落手做，依家就嚟搬得，真係要速戰速決！

補習就一路都有補咖啦，不過問題係當其他嘢開始佔用你嘅時間嘅時候，你先知道同人約補習時間係幾咁困難。每次都要諗清楚，嗰個時間係咪真係可以free到出嚟，約實又唔可以成日因為有咩變卦而推，真係搞到我一頭煙。

時間上的取捨

所以都係要去返最後一個Point。
我好鐘意教德文，但係教德文唔係我正職，如果補習時間真係越嚟越難騰出嚟嘅話，我有兩個選擇：收山，放返啲時間落去做嘢，家庭度。

不過我唔甘心，教咗咁多年，我唔想放棄。
睇返之前啲Post，我其實早大半年前，已經有構思咗網上課程嘅框架，而且有整一段測試影片，收到好多Feedback，不過一路都無特別大動力去做，失策。到依家，其實錯過咗可以花時間同心機準備課程嘅黃金時機。

換咗凸手，『迎難而上』無咩人再講，依家等我嚟啦！
好快我就會上返水咖啦。