舊年因爲我嘅A1網上課程開始收生，諗返起好多以前好多學生話要學德文，最後無疾而終嘅經歷。亦都諗起我之前一個讀書仆咗街嘅故事，今日就同大家分享。
一個外人嚟德國，點會無仆過，但讀書嘅時候，有一次仆得好甘好甘，原因係…
「唔誠實」
放心，我唔係走去周圍呃人，導致出事，而係我自己呃咗自己。
...
話說，讀德國Engine嘅Degree，理論上要讀六個Sem，再加埋一百日嘅Intern（德文叫Praktikum），即係話要讀七個學期嘅時間。
好耐以前同啲大學同學分享Dank
memes嘅時候，有一個個咁講：
「一個工程學生無可能會講咩？」
"Meinen Abschluss schaffe ich ganz sicher in der Regelstudienzeit."
意思係：「我一定可以正常時間畢業啦！」
一個德國Engine學生，需要八個九個Sem先讀完Degree，係正常不過嘅事；甚至十個十一個Sem先至讀得完，亦時有所聞。
當時我知道呢個講法之後，竟然畀一個Meme改變我思維，就坐定粒六，覺得反正都要遲，不如將第3個Sem嘅科目一分爲二，唔報六科，淨係報三科，等我可以抽多一半嘅時間用嚟讀專心德文啦！
我好早就知道學德文係好緊要，咁我就懶醒，當時畀自己嘅目標，係第三個Sem尾就要攞到DSH張Cert（你當B2-C1左右啦），本來學校話畢業前考就可以，其實無咩時間壓力。
但其實呢個理想好唔現實，人腦唔係水桶，啲心力唔可以左倒右倒，你多咗咁多時間出嚟，肯定無可能全部搬曬去讀德文。
加上我揀科，揀正一科Signal processing，呢一科我以前喺中大讀過，讀到想嘔嘅Fourier-Transformation，z-Transformation之類嘅系統理論，我發現就算時間多咗都好，自己根本無能力應付「德文」+「數」左一拳右一拳嘅攻擊。
更加唔好講，其實我係要半工讀，當時我爲咗生活費，每個禮拜都要返十個鐘工。
第三個Sem讀咗陣，我就知唔對路。
但係，我做咗一個好錯嘅選擇。
我選擇咗呃自己。
當時我喺大學度讀德文，學校會幫你準備考DSH，但DSH有樣嘢好撚衰，你做Reading，答問題要寫完整句子，如果句式錯的話，就算內容你啱曬都好，都會扣一半分！
我當時讀唔嚟，就狂走堂，我德文老師話好失望，話我一開始明明話想今個Sem考DSH，點解唔繼續學。我話因為呢個考試唔公平，所以我寧願自學，自己考TestDaF。
其實我講嘅時候，都知道呢個係藉口，就算DSH衰，我其實都應該要練自己嘅寫作能力，我又根本冇需要咁急考，係我自己懶醒話要早啲考咋嘛。
唔止德文，我連其他Engine堂都走埋，我呃自己話：德文我聽唔明，所以先唔識，我要返去自己研讀筆記，唔好上堂聽啲教授用德文講。
呢個都係藉口，逃避上堂，就可以將讀書嘅時間同壓力一路拖延，放到Sem尾。
拖延症嚴重嘅病徵就係有幻覺，總覺得去到最後，全部嘢都會船到橋頭自然直。
結果，我嗰個Sem生活顛倒，成日夜晚自己自修，朝早起唔到身，更想走堂，越走就越要夜晚追。
最後，第二個Sem，我淨係考咗兩科，成績麻麻，因爲我好清楚Signal processing我去考的話，一定肥。
（題外話，德國大學考試唔洗Reg科，你要去上就直接上，Sem尾淨係要reg考試而已）
TestDaF結果你都估到——我無去報，因爲我知道自己未夠料，同樣無疾而終。結果半年之後，做完實習，有機會逼自己講多啲，先谷到上去。
半年嘅時間，換嚟兩科爛Grade，少少德文嘅進步，我依家諗返係好唔抵。
呢一個失誤，亦唔係無後果，因為呃咗自己，變咗到最後一年，我仍然有十科未考，仲要寫一篇論文。
但係去到最後，我已經唔想再浪費時間，唯有用最地獄式嘅方式嚟完成學業。因爲我選擇喺Offenburg嘅一間工程公司寫論文，咁我其實係冇可能去Mannheim上堂。所以我決定，尾二嗰個學期，我上十科嘅堂，reg當中六科嚟考。
而去到最後一個學期，我就一路寫文，一路溫返之前嗰四科嘅嘢，到最後交Thesis之餘，順手考埋呢幾科佢。
雖然話係地獄，但係其實辛苦得嚟，覺得好坦然，因為我冇呃自己。我無逃避，我無再畀藉口自己，我要讀十科都好，我堂堂坐第一排，坐正Professor前面，有問題我會舉手答，有咩Lab我會盡力做。
變返一個典型嘅亞洲Nerd學生…😂
力挽狂瀾，到最後，我淨係比Regelstudienzeit，讀多咗一個Sem咁多。
經過咗呢件事之後，我就好有深刻體會，能力不足，甚至承認失敗，根本無咩大不了，但對自己唔誠實的話，你只會玩死你自己。
你為咗面子，可以對任何人講大話，但其實你係冇理由要呃自己。對自己寬容啲，畀自己柒下，畀下空間自己承認之前睇錯，然後咬緊牙關去做你應該要做嘅嘢，咁先係會令到自己成長。
如果你真係想讀德文的話，點解唔依家就行動？德文太難？遲啲等我有時間先？睇下先？對自己誠實啲，畀個機會自己，認認真真讀一個課程！係想行動，就睇留言/Bio！
P.S. 考到TestDaF，當時德文老師仲好大方恭喜我…我最後同佢道歉，承認我當時做錯，佢笑咗一下，唔知道係原諒定一笑置之…
延伸閱讀：
【杉下說德文】石賈墨｜人工智能即將取代德文教師？ChatGPT表現有多驚豔？ （二）
【杉下說德文】石賈墨｜人工智能即將取代德文教師？ChatGPT表現有多驚豔？ （一）
此為石賈墨之原創文章，轉載前請事先徵求授權並註明出處 www.stegermatt.de
想知多啲有關課程嘅資料？即刻Click入嚟呢到睇下啦！
歡迎隨時聯絡我了解更多
WhatsApp: +4917695274920
Signal: +4917695274920
Telegram: @Stegermatt
Write a comment