二零二零年，有人問我，到底喺德國嘅香港人，可以做咩先會影響到德國嘅政治格局。
聽返當時一個訪問嘅錄音，我有講過兩個想像：
1. 喺德國選舉之前，分析各個政黨嘅對華政策同立場，陳述返香港人嘅觀點，雖然影響未必話會十分大，但係始終會係一個嘗試影響選舉嘅行動，可以起到刀仔鋸大樹嘅效果。
2. 通過參與同選舉有關嘅議題，全力爭取空間，喺管治權力變更嘅空隙入面，再爭取機會刷新德國政黨對華政策更實在更決斷嘅認知。
所以，當同穆達偉（講佢中文名有啲奇怪，都係叫佢David多）做Live，講佢呢個Idea出嚟嘅時候，雖然我當時對香港議題參與有好大懷疑同反思，我仍然同佢講，佢一定要堅持，一定要做得到，如果要人的話，我第一個舉手。
同時間，我地同黃台仰都有因爲香港議題，三個人走埋一齊傾...
結果，姣婆守唔到寡，我都選擇再一次落水...
David用佢對中國議題嘅認知，寫咗呢啲議題出嚟，做咗好多功課，不斷同其他NGO，政黨協調。阿Ray就睇睇成樣嘢點樣execute，一齊執下啲行動計劃，用盡佢嘅政治聯繫去令到成樣嘢運作得更加順暢。佢地兩個真係好猛料！
而我呢，就做下打雜，咩都幫下手畀下意見，拍下片，幫手搵人整Design，搵人整網站，搵人剪片...
因爲實在有太多細節融合埋一齊，所以呢一兩個禮拜臨門一腳，我呢個無咩經驗嘅「僞Project manager」都真係要爆一爆肝先頂得順。
少少辛苦，但係好開心，因爲真係終於幫到手做到一樣一路都喺我想像之中嘅事情。
我之前對自己好有懷疑，到底我喺德國嘅投入，係咪因爲我自己有咩做得唔好，所以先會有人鬧我？我自己係咪真係廢到完全無條件去爲香港出一分力？
原來係睇你同咩人一齊做嘢。
合作嘅過程，個個人都有啲甩漏，個個人熟嘅範疇都唔同，尤其我呢個政治素人又成日講埋曬啲on9嘢，但係我地都好直接，有碗話碗有碟話碟，仍然可以合作無間。
雖然，呢個唔係咩驚天地泣鬼神嘅大Project，但係我好想多謝David嘅付出，多謝阿Ray嘅付出，同埋Amy仲有其他有份幫手嘅人，佢地令到我感受到，念念不忘必有迴響，原來係真嘅。只要你掛住香港，山不轉路轉，用另一個方法點都可以出到一分力。
嚟緊到九月尾，我地會繼續跟蹤選德國選舉動向，同大家玩下Live，等大家對德國政治格局可以有多啲認識！
記得將呢個「選舉意向機」些牙畀身邊嘅德國人同香港人（可能你認識嘅香港人都會有認識德國人呢！），等更多德國人可以瞭解多啲對華政策嘅重要性！
延伸閱讀：
此為石賈墨之原創文章，轉載前請事先徵求授權並註明出處 www.stegermatt.de
有嘢想講？可以喺下面留低你嘅意見。
歡迎隨時聯絡我了解更多
WhatsApp: +4917695274920
Signal: +4917695274920
Telegram: @Stegermatt
#石賈墨 #時事議題 #德國時事
#Bundestagwahl21 #德國國會大選 #ChinaWahlCheck #對華政策 #Wahlomat
Write a comment