利用Yabla網站睇片學德文

如果想用優惠價,加入Yabla嘅睇片學德文一年Subcription,可以即刻登記:

留喺屋企學德文

 

武漢肺炎,肆虐全球,依家人人都要儘可能留返喺屋企,生活模式真係唔同曬。就算想學德文都好,依家歌德都暫停曬全部課堂,改用網上教學嘅模式嚟上堂,有時候真係覺得未必好夠喉。所以而家好多學生都問我點樣可以足不出戶,盡用網上資源嚟幫自己繼續學德文。

 

咁首先我一定要幫自己賣下廣告先啦!我其實喺幾年前已經開始用網上補習社嘅形式嚟幫學生學德文,今次疫情,對於我嘅教學模式,影響其實係接近零…如果要人在德國,都可以教到香港嘅學生,你諗下,唔用遙距教學的話,邊有可能。

 

雖然話同自己賣廣告啫,課堂時間始終都有限,我自己上堂真係希望多啲「教書」,如果係做練習的話,好需要啲學生自己抽時間嚟做練習。作爲曾經都係初哥嘅德文學習者,如果講話咩學德文嘅心得,有一樣嘢我係好憎聽到嘅:好多學過德文嘅人,會話咩多聽多講多睇多寫喎…

 

嘩,果然係大師,我真係唔知畀咩反應佢好。

 

足不出戶,睇片「浸」德文

 

授之以魚不如授之以漁,呢一個係我幫學生學德文一個好重要嘅理念,所以我覺得我有需要同學生講一講,我有啲地道嘅德文,到底喺邊度學返嚟,教佢地自己學,更加有效率。咁你肯定會講,你住咗喺德國十年,老婆又係德國人,你自然學到地道德文啦!係,但係除咗我喺德國嘅生活經驗之外,都有可能可以學到地道嘅德文嘅。

 

有研究比較過唔同嘅學習方法,如果想學好一樣嘢,通過閱讀,效益係最差,聆聽比較好,用視覺的話,又會更上一層樓——如果將「聽」同「睇」結合一齊嚟做,會有協同效應,效果會更加理想。如果你有聽過甚至用過「Immersive reader」的話,你會明白個道理喺邊。當然,有機會可以主動「講」的話,學習效益會比以上所有方式都更加好…不過要有能力進行「創作」嘅過程,都一定要有咁上下嘅「材料」先可以,所以我先講「接受資訊」嘅學習方法先。

 

啲人成日話學語言要「浸」,除咗嚟德國學有「浸」嘅效果之外,其實都可以退而求其次,尋找一個最高效能嘅「Immersion」效果。睇片,又有「聽」嘅元素,又有「睇」嘅元素,如果加埋字幕,就有埋「閱讀」嘅成份,可以話係同德國人對話以外,最大嘅Immersion。

 

所以,只要睇片,嚟將自己投入德文嘅世界,就可以做到所謂「浸」嘅效果。

講到睇片的話,方便又免費,睇YouTube或者係開Netflix睇德文劇就已經得。不過用呢兩個渠道嚟睇片學德文,稱唔上係最好嘅方式。

 

無錯,YouTube的確有非常之多質素高嘅內容,而且又係免費,淨係講啲學德文嘅Channel,已經多如恆河沙數,但係始終真係要用嚟「輔助吸收」,個界面真係唔係好就手…YouTube始終都係一個娛樂嘅平臺。

 

而Netflix睇德文劇,對話可能對於某啲初學者嚟講,實在太深,有德文字幕都未必跟到,所以只限德文有返咁上下水平嘅人用煲劇嚟進修。

 

所以我想介紹一個我自己喺以前學德文期間都有用過嘅網站。

 

Yabla - 「語言學習版」YouTube

呢個網站叫Yabla

Yabla呢個網站,有好多種語言可以俾你揀,德文只係其中一個。簡單啲嚟講,呢個網站其實就係一個有好多德文片俾你睇嘅網站…

 

不過,要睇片的話,係要課金的,一年要九十歐元,圍返港紙七百五十幾蚊,除開一個月六十幾蚊。

俾錢睇片!咁我不如睇YouTube算數!

人家收得你錢,其實係有原因的,我自己課過金,當然係覺得值先會課同推薦畀其他人用啦。

 

首先,呢個網站,強調啲片authentic,翻譯成爲廣東話,應該係講「唔離地」,網站入面有成千上萬條片,從卡通,訪問,短劇,煮食,新聞,科普,教學,甚至到兒童不宜嘅內容都好(例如有啲粗口歌MV),包羅萬有,而且全部都分好類別,亦都會有難度分級,唔單止方便你搵自己想睇嘅嘢,更加可以搵到難度上適合你嘅片。

 

雖然有分類,係幾方便,但我覺得呢個都唔係佢值錢嘅地方。佢值錢嘅地方係佢有一個自己嘅Player,等我介紹返。

 

首先,大家可以用以下條Link,睇睇Yabla免費俾你試睇嘅片。免費影片一共有七條,用下面條Link會直接入去一條「介紹Yabla Player」嘅片。

 

觀看示範影片

 

預告:女主持Jenny小姐表情多多,隔住個Mon都覺得難以直視,不過既然係介紹影片,將就一下啦…

睇唔落的話,等我介紹一下Yabla呢個Player有咩功能啦。

 

1. 你見到,每一段片都有字幕,而且係德英字幕,一早幫你翻譯定!如果想知道一個字比較深入嘅翻譯,可以Click落去,右邊嘅字典,會有詳細嘅資料。我覺得呢個雙語字幕,係Yabla值錢嘅核心。有字幕,學起上嚟真係快好多,而你亦都唔需要話怕唔明,因爲有英文解釋幫你(儘量唔好睇英文先,甚至可以熄咗佢,逼自己睇德文字幕先)。

 

2. 佢有一個「減速」模式,如果你覺得段片入面嘅對話太快,你可以Click落隻龜度,佢可以將速度下降到75%或者50%,而個Player會自動調節返把聲嘅音調的!雖然仍然會有少少唔自然,但係對於掌握發音,跟讀真係有好大幫助。我當時都有成日用呢個功能,主要係當影片入面嘅人講啲長句子嘅時候,入面有啲短嘅字,感覺會「飛咗」,用慢速聽,就可以確定返佢讀法係如何。

 

3. 如果連減速都幫你唔到,你仲可以用「狂Loop」模式,Click落去個「旋轉」Icon度,嗰句句子就會不停Loop,Loop到你覺得自己聽得清楚,讀得清楚爲止。

 

4. 你見到右下角,有一個Games嘅制…唔好咁大期望,所謂嘅Game,都唔係話好好玩…Multiple Choice啲選擇我覺得實在太白癡,所以唔建議你做,不過Fill in the black係會幫到你串字的。真係最好玩係攞咗專利嘅Dictation,佢會播返啲句子俾你聽,然後要你默返出嚟。老實講,細個默書,真係好大壓力,真係幾十年無默過,用呢個方式嚟默,其實都叫幾好玩。而且默書係真係幫到你Listening同Writing好多,兩者係可以同時咁練。呢個默書模式我都誠意推薦。

 

 

好啦,我諗我咁介紹完,你都大概知道Yabla呢個網站係點樣幫你學德文的。

 

如果你地考慮緊的話,我中立咁分析一下啲優點同缺點俾你地參考下。

 

優點

  • Yabla啲片全部都取自現實生活入面會遇到嘅形式,好多片入面講嘢嘅人,都係用最生活化嘅方式嚟講,可以幫到大家學地道嘅德文。
  • 有片睇,有聲聽,又有德文字幕,加埋英文翻譯,老實講,睇嘅時候真係好有「完滿」嘅感覺,我唔知道可以用咩形容詞嚟描述呢種感覺,總之就係爽。
  • 簡單嘅字,用Yabla player學,好快就可以初步學曉。
  • 睇片,好過你睇書做練習啦係咪呀,睇落係會有興趣繼續睇落去的。
  • 默書模式,值得推薦,可以確實快速提升聆聽同寫作能力。

 

缺點

  • 可惜嘅係字幕啲翻譯,用嘅字典,質素唔係好好。如果要學得好啲,都係要另外自己再查。不過我自己覺得Yabla係強調Immersion,所以如果真係認真學,都係要查字典,所以都唔係一個重大缺憾。
  • 有時候有啲片雖然無話兒童不宜,但係入面有啲好粗鄙嘅用字,唔可以個個場合都講,所以有可能會學壞…
  • 如果有埋其他學習配套,例如話提供例句,或者一啲語法上嘅分析,我諗就真係完美啦…

 

雖然話係有缺點啫,但係如果你經我入Yabla課室睇片,一年收費567元正,一個月唔駛50就可以俾你睇到飽,算係咁啦係咪呀。

 

如果有興趣用優惠價訂閱Yabla服務,可以入去填Form,我好快會聯絡你!

備註:呢一篇文,係包含咗我同Yabla網站之間嘅Affiliate programm,如果你用呢度嘅Link嚟申請Yabla服務,我係會有Return的。