我哋應該點睇移民呢個問題？呢幾日都有好多嘅討論，我自己思考呢個問題都思考咗好耐，一路都有做下筆記，我依家就針對返網上見到嘅睇法，做少少簡單嘅總匯同分析，加上少少意見，等大家可以思考多啲。
利申：已經離開香港，喺德國生活超過十年（所以唔關近年香港政治環境事），仲未攞德國護照，亦返唔到香港（或者好似啲人講，其實跳傘可以唔需要帶降落傘，不過你淨係可以跳一次囉，咁我諗我都可以返一次香港嘅…），我亦有偶爾幫香港人做德國移民諮詢。我會嘗試抽離我嘅角色，純粹講講我自己嘅睇法。如果你覺得我依家唔喺香港，做移民諮詢係食人血饅頭，遠距離喺度指指點點的話，可以離開，免得你勞氣。
「國際戰線論」
如果講話香港嘅運動大概有三條戰線，我諗我講街頭戰線，議會戰線已經全軍盡墨，雖然殘酷，但相信無咩人會反對。
當然，「生活戰線」例如黃色經濟圈，「學術戰線」例如廣東話保育運動等等間接嘅抗爭，仍然有操作空間，但無謂討論失焦，所以從略。
國際戰線嘅空間，相對嚟講，仲有少少空間。但要留意，我係話「相對嚟講」，如果擊倒極權需要嘅能量係一百分，街頭戰線同議會戰線已經歸零的話，國際戰線可能有十分八分嘅。
加入國際戰線唔可能成爲移民嘅主要原因，因素有幾個：
大部分移民嘅人係香港都無政治參與，就算本身有政治能量，去到外國都未必用得出。我曾經同一個德國政府官方機構有重要職位嘅人交流過，係有關注中國議題嘅，我同佢講起黃台仰（德國第一批香港難民），佢竟然完全唔知佢係邊個。連黃台仰都慘被「老鼠」，你話移民即刻去打國際戰線，實在係貽笑大方。
去到外國，好多嘢都要重新嚟過，語言，文化，政治聯繫都唔係一下就可以掌握到，就算你真係有心，去到外國幾時先可以真係幫到手？淨係睇美國大選討論，香港網民嘅表現，都令人知道普通人同外國在地政治討論同參與嘅距離有時候真係好遠。
香港海外羣體，好多時候都仍然未有可持續發展嘅基礎，山頭主義嚴重，財政基礎薄弱。除非你好有錢，可以免費做十年八年義工，又可以拉住好多人，開到法定組織，否則你都係「撈波啲」。
但係咁代唔代表去外國真係完全幫唔到香港議題？咁當然唔係，好多人都可以從側面幫手，例如話鄭敬基佢去加拿大都有做到好多嘢，我都知道超級多有心嘅香港人都係有默默幫助，做到幾多得幾多。呢樣嘢真係無辦法抹殺，但「移民」同「外國戰線」之間嘅關係有幾密切，我自己有保留。
「貢獻極權論」