· 

【香港時事】移民不移民?淺談香港人嘅去留問題

 

 

 

 
應該點睇移民呢個問題?呢幾日都有好多討論,我自己思考呢個問題都思考咗好耐,一路都有做下筆記,我針對返網上見到嘅睇法,做少少簡單嘅總匯同分析,加上少少意見,等大家可以思考多啲。 
 
利申:已經離開香港,喺德國生活超過十年(所以唔關近年香港政治環境事),仲未攞德國護照,亦返唔到香港(或者好似啲人講,其實跳傘可以唔需要帶降落傘,不過你淨係可以跳一次囉,咁我諗我都可以返一次香港嘅…),我亦有偶爾幫香港人做德國移民諮詢。我會嘗試抽離我嘅角色,純粹講講我自己嘅睇法。如果你覺得我依家唔喺香港,做移民諮詢係食人血饅頭,遠距離喺度指指點點的話,可以離開,免得你勞氣。 
  

 
「國際戰線論」 
  

 

 

如果講話香港嘅運動大概有三條戰線,我諗我講街頭戰線,議會戰線已經全軍盡墨,雖然殘酷,但相信無咩人會反對。 

 
當然,「生活戰線」例如黃色經濟圈,「學術戰線」例如廣東話保育運動等等間接嘅抗爭,仍然有操作空間,但無謂討論失焦,所以從略。 

 
國際戰線嘅空間,相對嚟講,仲有少少空間。但要留意,我係話「相對嚟講」,如果擊倒極權需要嘅能量係一百分,街頭戰線同議會戰線已經歸零的話,國際戰線可能有十分八分嘅。 
加入國際戰線唔可能成爲移民嘅主要原因,因素有幾個: 
 
大部分移民嘅人係香港都無政治參與,就算本身有政治能量,去到外國都未必用得出。我曾經同一個德國政府官方機構有重要職位嘅人交流過,係有關注中國議題,我同佢講黃台仰(德國第一批香港難民),佢竟然完全唔知佢係邊個。黃台仰都慘被「老鼠」,你話移民即刻去打國際戰線,實在係貽笑大方。 

 
去到外國,好多嘢都要重新嚟過,語言,文化,政治聯繫都唔係一下就可以掌握到,就算你真係有心,去到外國幾時先可以真係幫到手?淨係睇美國大選討論,香港網民嘅表現,都令人知道普通人同外國在地政治討論同參與嘅距離有時候真係好遠。 

 
香港海外羣體,好多時候都仍然未有可持續發展嘅基礎,山頭主義嚴重,財政基礎薄弱。除非你好有錢,可以免費做十年八年義工,又可以拉住好多人,開到法定組織,否則你都係「撈波啲」。 

 
但係咁代唔代表去外國真係完全幫唔到香港議題?咁當然唔係,好多人都可以從側面幫手,例如話鄭敬基佢去加拿大都有做到好多嘢,我都知道超級多有心嘅香港人都係有默默幫助,做到幾多得幾多。呢樣嘢真係無辦法抹殺,但「移民」同「外國戰線」之間嘅關係有幾密切,我自己有保留。 
  

 
「貢獻極權論」 
  

 

 

留喺香港,有搵錢有交稅,出糧畀林鄭,畀黑警買武器,起音樂噴泉,嬲唔嬲?嬲!一反好多人嘅睇法,話「你賺得幾多錢,交得幾多稅啫」,呢個講法我十分討厭。投票?「你一個人先一票,改變到啲咩啫」環保?「你一個人用少個膠袋,救到個地球咩」… 

 
清楚自己有選擇嘅權利,係任何社會改變嘅根源,話一個人有咩力量嘅講法,完全講唔通。 
除非你可以喺香港生活又唔需要交稅畀政府,否則你認爲交稅畀政府係成爲幫兇的話(我認爲呢個諗法有佢道理),就只有離開一途。 

 
但係都要咁睇,你留喺香港,雖然要交少少稅畀政府,但你喺香港嘅存在,有無可能幫到其他人?可能你搵到食,所以有時間空間可以做到支援嘅工作,出到少少錢幫有困難嘅同路人,咁其實權衡利害,你留低都唔會係純粹供養極權嘅。 
  

 
「逃兵逃難論」 
  

 

 

有人認爲移民嘅人係「逃兵」,相反有人認爲係「逃難」。我自己咁睇:首先,就算你有黃色信仰,參與多少,無人可以對你進行批判。逃兵?點解我要係「兵」?我會爲肯企出嚟嘅人鼓掌,但絕對唔會話無參與嘅人就係「港豬」,個個人條件唔同,根本無得比較。尤其係高風險嘅人(例如之前曾經被咬,或者有好多政治參與),覺得唔對路,走嘅一霎那,真係可以叫逃難…唔走要坐十碌八碌,都唔叫逃難? 

 
有人肯冒險留低,甚至知道要被捕坐監,仍然堅持,呢樣嘢點睇?下面再講。 
  

 
「爲下一代論」 
  

 

 

我唔知道其他國家係咪啦,我估計都係:好多有仔女嘅人,話想移民德國,其實都係爲咗仔女。我身爲人父,知道「我嚟到德國生活成點就唔重要啦,最重要係啲仔女…」呢句嘢唔係大話,背後都好悲涼。其實,如果有少少家底,喺香港無特別多政治參與,留喺香港唔好?去到外國重新開始,真係咁容易,咁爽歪歪咩? 

 
不過,我記得有人話呢個年代結婚都係endorse個政權嘅行爲,其實真係好扭曲。我記得我細個聽李麗珊話養小朋友要400萬,我唔知我老豆老母用咗幾多錢但肯定無400萬。以前我屋企未上公屋,租嘅地方極細,我同我阿媽細妹三個人係要打橫訓喺張床的,我依家咪又係無穿無爛…其實,小朋友唔會話覺得生活條件差會唔開心無童年,只要父母教養好小朋友,就唔好太高估生活條件同教育系統對小朋友嘅影響。尤其係父母去到外國,都未必適應到,小朋友成長都會有困難的,唔會去到外國就一天都光 

 

但係,愛國洗腦教育,會唔會真係父母堅持到,就完全無影響?當小朋友身邊不斷發生唔公義嘅事情,聽到身邊嘅同學越嚟越多係講普通話,越嚟越多題目課堂老師話唔俾討論,就算有得討論,俾到分嘅結果嘅範圍又越嚟越窄,到底對下一代有幾大影響?想佢平安過活就希望佢聽聽話話,但唔想佢臣服極權喪失思考能力就會希望佢識得反抗——可以的,納粹時期德國都有白玫瑰同剛剛過咗100歲壽辰嘅Sophie Scholl,物極必反,極權之下都一定有人仍然保有良知...不過Sophie Scholl慘被處死,做父母的話,到底可以點教育仔女? 

 
不過呢一點我覺得係其中一個最難辯駁嘅移民理由。 
  

 
「送頭傻仔論」 
  

圖片來源:蘋果日報 

 

堅持留低,就算要坐監都好,係咪送頭?係咪傻?叫人唔好走,就係共諜? 
呢一點唔想多講,但今時今日仲講啲咁嘅嘢的話,屌。 

 
個個都功利,邊個上街?邊個會企出嚟?邊個會反抗?就算我唔會咁選擇都好,對於好多香港人嚟講,佢當香港係佢命運共同體,無論如何都要留喺香港,有幾難明?我身在外國,唔需要擔驚受怕,叫好好彩,我就更加唔會批評啲肯留喺香港,或者叫人留喺香港嘅人,因爲香港之所以仍然係香港,就係有一班唔肯放棄嘅人,如果同路人真係走,咁就真係「香港已死」。難聽啲講,我喺德國有公開參與,咪又係搵自己笨?你都可以講話係送頭啦? 

 
呢個世界,有啲嘢唔係計較表面嘅成功定失敗,而係當下你覺得你自己對咩價值有最大嘅堅持而去做的。有人提出自己意見,就話人被逼,被收買,呢啲我就真係最不屑。 
  

 
結語 
  

我諗個討論嘅底線,就係選擇去留同抗爭參與無一定嘅關係。選擇去嘅,可能有佢嘅無奈,選擇留嘅,可能都有放唔低嘅擔子。 

 
講真,有心嘅,喺外國都會參與國際線工作,無心嘅,留喺香港都可以係對於成場運動毫無正面幫助。所以啲要搶光環嘅人,走嘅時候就會話佢去打國際線,留嘅時候就會話同極權戰鬥到底。 
 
希望呢篇嘢可以畀到少少思考空間畀大家諗諗移民呢個問題,歡迎交流。 

 

 

延伸閱讀:  

  

此為石賈墨之原創文章,轉載前請事先徵求授權並註明出處 www.stegermatt.de  

  

想緊貼我嘅最新動態?即刻Follow我嘅FacebookInstagram!   

有嘢想講?可以喺下面留低你嘅意見。 

  

歡迎隨時聯絡我了解更多  

WhatsApp:  +4917695274920  

Signal: +4917695274920  

Telegram: @Stegermatt  

   

 

Write a comment

Comments: 0