【移民諮詢】想移民？諗清楚先！石賈墨德國移民諮詢服務

May be an image of text that says '石賣墨德語補習社 www.stegermatt.de 移民？ ? 諗清楚先 + 快移民咨詢'

唔講咁多廢話，我知道大家依家不斷咁討論緊移民呢個問題，我私底下有解答過好多朋友嘅問題，甚至有幫緊朋友移民德國，所以我覺得自己可以爲大家提供德國移民諮詢服務。

無論你係依家即刻想搵我傾移民大計好，定係即刻覺得我下賤地想發災難財都好，我好希望你可以睇埋落去先。

首先，我自己好鍾意德國，所以我一定會好希望有能力，有機會，有心嘅人，可以嚟德國生活。移民，唔等於做逃兵。所以我一定會同你講好多德國嘅優點，但係我認爲自己有責任傳送德國真實嘅一面畀香港人睇，缺點照講，唔會話德國生活堪比天堂。

移民諮詢服務三大原則

所以原則一，我淨係會解答有關移民德國嘅問題，提供中立嘅資訊，同埋我個人移居德國嘅十年生活經驗畀你聽。唔適合移民的話，我會照直講，唔會拖。之前都有好多朋友搵我傾有關德國移民嘅問題，我無搵佢地寫Review啦，但係當中唔少如果條件唔適合的話（無專業能力，無確實可以學德文嘅計劃，無財政上嘅準備），我如實告知，傾完就case closed，無謂浪費時間。

原則二，諮詢服務，係純Consulting嘅服務，我無Package賣畀你，講到明唔會幫你搞Visa唔會幫你做手續唔做任何承諾，唔會「保證申請成功否則原銀奉還」。如果呢啲嘢自己都做唔嚟，就唔好打算移民嚟德國，到你嚟到德國，都係要自己搞（除非你真係有錢到可以買曬咁多服務，咁你咁疊水都應該唔需要搵我傾，真係搵返移民公司幫你做曬就得啦）。

原則三，我提供諮詢服務嘅目標，係解答香港人有關移民嘅問題，希望喺最短嘅時間內，等你地清楚移民德國嘅計劃到底應唔應該做，有咩方法可以實行到呢個計劃。唔好期望傾完一次之後，就可以即刻有好路數可以移民，我亦都唔係專業移民專家，但係我可以保證我會畀到有價值嘅答案你。如果你有第二啲期望的話，唔好聯絡我。

講完原則，如果你認同，又想嚟德國生活，又有問題想我幫你解答，咁就請你：

1. 直接用WhatsApp聯絡我：https://wa.me/4917657951734

2. 介紹下你自己嘅背景（年齡，職業，學歷，資歷，家庭等等等等），越詳細越好

3. 列出你有嘅所有問題，越實在越好，無論係移民條件定係對德國生活嘅疑問都好，都可以全部寫曬落嚟先

4. 到我睇完之後，我會回覆你，值得傾落去嘅，就會同你約時間，用Video call嘅形式傾

5. 時間同價錢會根據每一個查詢而定

呢個Post係話畀大家知，我會有限度提供呢個服務咁解，稱唔上賣廣告，如果有懷疑，覺得要畀錢諮詢不如去移民公司攞免費資訊的話，咁你不如就真係去搵移民公司算啦，你話我倒自己米都咁話。我自己暫時身份係德文教師，未想轉型做移民顧問，但係希望真心想移民嘅人有一個途徑可以攞到中立嘅資訊。

WhatsApp見！