· 

【德文學習】超越巔峰!2018年完美終結之C2+里程碑 

 

 

 

 
你可能覺得我好變態,但係我記得當初考完TestDaF之後,即刻買咗本講C2考試嘅書返嚟睇。係考完之後嗰日已經開始睇C2嘅書——我老婆話:你閉關咗兩個禮拜,依家考完試,竟然仲有心情睇書?其實考完試,德文水平係處於一個小巔峰嘅狀態,唔好浪費,一於食住上。我TestDaF Lesen係好彩有5的,然後我做C2Lesen,係僅僅合格,我心裡面起碼有個譜,原來C1C2真係可以差遠。 
 

 

超越C2 
 

我好早就好清楚,我終有一日一定要考個C2返嚟。 
聽可能覺得我好串,但係唔好誤會我:我決定咗留喺德國生活,我就唔當學德文係一個苦差,而係一個習慣,一個對自己小小嘅要求。所以我都係每日讀少少讀少少C2其實都係用日子換返嚟。 
 
考完C2之後,我曾經有段時間,覺得自己無咗一個練習嘅目標諗落,原來我就係一個犯賤嘅香港人,俾學校逼考試逼得多,無得考,依家反而就唔自在。所以我走去問我老師:『考完C2,我想繼續上,有無得玩?』 
 
『有!去大學報Germanistik嚟讀啦!』 
我心講呢啲?不過一時唔知道『講呢啲』德文點翻譯好,所以吞返落肚算數。要我讀Germanistik就一定無可能啦,唯一真係有考慮過嘅係考個staatlich geprüfter Übersetzer返嚟,但係佢批准你考試嘅條件都真係好苛刻,更加唔需要講個考試本身係有幾難,所以最後都係放棄咗。 
 

 

「C2+」歷程碑 

 
講到C2爆表』呢問題:呢幾日聖誕新年放假,時間抽到出嚟,當然係用嚟陪屋企人,陪陪下,竟然俾我陪咗個『C2+』歷程碑出嚟。 
 
話説我外母退休之前係教德文同英文嘅,語言水平十分高,我之前考試嘅時候,佢幫我改唔少Schreiben,我德文考試考得好,佢居功至偉。假日聚會,佢好鐘意玩Scrabble 
 
係呀,德文都有Scrabble的。玩法同英文係一模一樣,不過好自然因為啲字母出現嘅頻率同英文唔同,所以字母分數自然都會有所不同。講起Scrabble,德文叫有彈性過英文,因為德文可以自己組合啲複合詞Kompositum,所以好多時候可以駁上駁,令到成盤遊戲嘅延續性高啲。 
 
娛樂嘅嘢,我一路都有參與,主要都係陪跑啦,分數唔係最低嗰個,我已經偷笑。Scrabble係好講究詞量,同埋對啲語素組合形式嘅熟悉程度。 
 
舉個例子,唔知道大家知唔知,英文同德文嘅字母Q,喺一個生字入面,後面都一定會跟U 
唔知嘅聽咗之後會覺得好驚訝,但係玩Scrabble玩得多就一定會學到。 
 
話説食完聖誕大餐之後,外母又癮起,話要玩Scrabble。無耐又要以一敵:退休德文教師,兩個心理學家(我老婆同佢家姐),四個對手都係德國人。 
 
第一次,竟然我喺Scrabble嘅世界上,歷史性擊敗所有對手! 
不過,叫得做遊戲,肯定唔係凈係講實力,運氣都一定要有。我今次真係好彩抽到靚組合(又有響音又有輔音),有機會出到三幾個屈機嘅字,一嘢就奪得幾十分,直接奠定我贏到其他人嘅基礎,唔知你見唔見到係邊幾個字呢? 
 
二零一八年已經過去,新一年話快又到,喺呢度我都祝大家二零一九年有一個新開始,學德文嘅繼續堅持落去,嚟到德國嘅就希望生活順順利利啦。 
 
月尾我會返香港一段長時間,希望到時可以抽到時間出嚟,好好實踐返自己嘅計劃啦! 

 

 

延伸閱讀:  

  

  

此為石賈墨之原創文章,轉載前請事先徵求授權並註明出處 www.stegermatt.de  

  

  

想緊貼我嘅最新動態?即刻Follow我嘅FacebookInstagram  

想知多啲有關課程嘅資料?即刻Click入嚟睇下  

  

歡迎隨時聯絡我了解更多  

WhatsApp:  +4917695274920  

Signal: +4917695274920  

Telegram: @Stegermatt 

 

Write a comment

Comments: 0